Vincent Kompany wabaye umukinnyi w’umunyabigwi mu ikipe ya Manchester City mu Bwongereza, ashobora kugaruka muri iyi shampiyona yubakiyemo izina aho ahabwa amahirwe yo kugirwa umutoza w’ikipe ya Burnely.
Kompany w’imyaka 36, usanzwe ari umutoza w’ikipe ya Anderlecht y’iwabo mu gihugu cy’Ububirigi, akaba ahabwa amahirwe menshi yo kuba umutoza wa Burnley mu gihe shampiyona y’Abongereza y’uyu mwaka w’imikino izaba irangiye.
Kuri ubu iyi kipe ihanganye no kutamanuka mu cyiciro cya kabiri, gusa ngo mu gihe yaba ibashije kuguma mu cyiciro cya mbere Kompany ashobora guhita ayerekezamo nk’uko inkuru y’ikinyamakuru Manchester Evening News ibivuga.
Burnley ibanziriza ikipe ya Leeds iri mu murongo utukura banganya amanota gusa bagatandukanywa n’ikinyuranyo cy’ibitego.
Kuri iki cyumweru iyi kipe iheruka gutandukana n’uwari umutoza wayo Sean Dyche bari bamaranye imyaka irenga 9 izakira Newcastle mu mukino w’umunsi wa nyuma wa Shampiyona.
Iyi kipe kuri ubu itozwa na Mike Jackson watozaga ikipe yabatarengeje imyaka 23.
Kompany wakinaga mu bwugarizi wubakiwe ikibumbamo kuri sttade ya Etihad ya Manchester City nk’umukinnyi wabaye umunyabigwi wiyi kipe, aho nibura mu mikino 360 yabashije gukinira iyi kipe yabashije gutwara ibikombe 10 ari kumwe nayo nyuma yo gutandukana.
