Ikigo cy’abacanshuro b’Abarusiya, Wagner, kuri uyu wa Mbere cyemeje ko bamwe mu barwanyi bacyo biciwe hamwe n’abasirikare bo mu Ngabo za Mali ubwo barwanaga n’inyeshyamba mu minsi ishize.
Uyu mutwe w’inyeshyamba z’Aba-Tuareg, Permanent Strategic Framework for Peace, Security and Development (CSP-PSD), mu itangazo washyize ahagaragara ku wa Gatandatu tariki ya 27 Nyakanga 2024, wavuze ko ingabo zawo zishe Ingabo za Mali zishyigikiwe n’abacanshuro ba Wagner, abarokotse zirabafata.
Ibiro Ntaramakuru by’Abafaransa, AFP, byasubiyemo ibyavuzwe n’umuyobozi waho ndetse wahoze ari umukozi mu butumwa bw’Umuryango w’Abibumbye mu Mujyi wa Kidal avuga ko byibuze abarwanyi 15 ba Wagner bishwe cyangwa bafashwe ubwo ingabo za Mali zasubiraga inyuma.
Kuri uyu wa Mbere tariki ya 29 Nyakanga 2024, Wagner yasohoye itangazo ridasanzwe risobanura “imirwano ikaze” yabahuje n’inyeshyamba, ivuga ko yatangiye ku itariki ya 22 Nyakanga kugeza ku ya 27 Nyakanga ikavamo intsinzi zitandukanye zakurikiwe no gutsindwa.
Muri iryo tangazo iki kigo cyagize kiti: “Bongereye ibitero rusange, bakoresheje intwaro zikomeye, indege zitagira abapilote na shahid-mobiles”. Yongeyeho ko ubutumwa bwa radiyo bwa nyuma bwakiriwe bwavuye ku itsinda ryagize uruhare mu mirwano bwaje ku wa Gatandatu.
Ku bwa Wagner, ubwo butumwa bwanditse ngo: “Twese uko turi batatu dusigaye, dukomeje kurwana.”
Iki kigo cy’abacancuro ntikigeze kivuga umubare w’abarwanyi bacyo baba barishwe.
Umuyoboro w’amakuru wa Baza Telegram, bivugwa ko ufitanye isano n’inzego z’umutekano z’u Burusiya, mbere wavuze ko byibuze abarwanyi 20 ba Wagner baguye muri iyo mirwano. Igisirikare cya Mali cyo cyavuze ko abasirikare bacyo babiri bishwe abandi 10 barakomereka.
