Kibati: Imirwano yakomeje ku munsi wa 3 hagati ya FRN na FARDC

‎Imirwano hagati y’abarwanyi b'ihuriro rya 'Front pour Refondation de la Nation' (FRN) n’Ingabo za Repubulika ya Demokarasi ya Congo (FARDC), zifashijwe n’imitwe ya 'Wazalendo', yakomeje ku munsi wa gatatu wikurikiranya kuri iki Cyumweru, itariki ya 18 Ukwakira 2026, i Kibati, mu gace ka Luberike muri Teritwari ya Walikale, mu Ntara ya Kivu y’Amajyaruguru.
‎
‎Nk’uko amakuru ava muri ako gace abivuga, humvikanye urusaku rw’intwaro ziremereye n’izoroheje kuva mu gitondo cya kare, ibigaragaza ko imirwano yatangiye ku wa Gatanu ushize ikomeje.
‎
‎Biravugwa ko Ingabo za FARDC n’abafatanyabikorwa bazo ba 'Wazalendo' bagabye igitero ku birindiro bya FRN muri ako gace, bagamije kwirukana abo barwanyi.
‎
‎Umubare w’abantu bagizweho ingaruka n’ibyangiritse muri iyi mirwano, imaze iminsi ibiri ikomeje, ntiramenyekana nk'uko iyi nkuru dukesha ACTUALITE.CD ivuga.
‎
‎Byongeye kandi, amakuru ava i Kashebere avuga ko izindi ngabo za FRN zageze i Kibati ku wa Gatandatu mu gitondo.
‎
‎Ibi bishobora gutuma imirwano irushaho gukomeza muri aka gace k’ingenzi, impande zombi zimaze iminsi zirwanira.
‎
‎Mu gihe kigera ku myaka ibiri, Kibati yabaye kimwe mu bice by’ingenzi bikunze kuberamo imirwano hagati ya FRN n’ingabo za Leta, zifashijwe n’imitwe ya Wazalendo, muri kiriya gice cya Teritwari ya Walikale.
‎
‎Ingabo za Leta zirimo kugerageza kongera kwigarurira ako gace, aho imirwano ya hato na hato yatumye abaturage ibihumbi bata ingo zabo.
‎