Waziri wa Mambo ya Nje wa Jamhuri ya Kidemokrasia ya Kongo (DRC), Thérèse Kayikwamba, amebadili kauli yake kuhusu madai ya kuwepo kwa mauaji ya kimbari dhidi ya Wahutu nchini Burundi mwaka 1994, aliyoyatoa hivi karibuni katika Umoja wa Mataifa.
Tarehe 16 Aprili, Kayikwamba alilihutubia Baraza la Usalama la Umoja wa Mataifa na kudai kuwa mbali na mauaji ya kimbari dhidi ya Watutsi yaliyotokea Rwanda mwaka huo huo, kulikuwa pia na mauaji kimya kimya dhidi ya Wahutu wa Burundi.
Alisema: “Tunakumbuka maafa mengine yaliyotokea katika eneo la Maziwa Makuu ambayo yalifunikwa na giza kwa muda mrefu. Mauaji ya kimbari dhidi ya Wahutu wa Burundi mwaka 1994 yalifanyika kwa siri na kuua maelfu ya raia.”
Kauli hiyo ilizua upinzani mkubwa, huku viongozi kadhaa wakimtaka Kayikwamba arekebishe kauli hiyo. Balozi Kateretse Fréderick Ngoga, mshauri mkuu wa AU kuhusu ushirikiano wa kimataifa, amani na usalama, alikuwa miongoni mwa waliopinga kauli hiyo akisema hakuna mauaji ya kimbari yaliyotokea Burundi katika miaka 31 iliyopita.
Katika taarifa iliyotolewa Jumapili tarehe 20 Aprili, Wizara ya Mambo ya Nje ya DRC ilisema kuwa Waziri huyo alikosea.
Ilifafanua kuwa tukio alilolizungumzia lilitokea mwaka 1972, siyo 1994 kama alivyodai.
“Tukio hilo la mwaka 1972 ni sehemu ya historia chungu ya eneo la Maziwa Makuu na linapaswa kukumbukwa na kutambuliwa kimataifa,” ilisomeka sehemu ya taarifa hiyo.
Japokuwa DRC inasisitiza kuwa kulikuwa na mauaji ya kimbari dhidi ya Wahutu nchini Burundi, taasisi kama Umoja wa Mataifa bado hazijathibitisha rasmi kuwa mauaji ya mwaka 1972 yalikuwa ya kimbari.
