Ikipe ya Young Africans yigaranzuye mukeba wayo Simba Sports Club iyitwara igikombe cya shampiyona, nyuma y’imyaka ine yikurikiranya Simba ari yo igitwara.
Yanga yabigezeho nyuma yo gutsinda Coastal Union ibitego 3-0.
Ibitego bibiri bya rutahizamu Fiston Mayele na kimwe cya Chiko Ushindi ni byo byafashije iyi kipe ikunzwe kurusha izindi muri Tanzania kwegukana igikombe cya shampiyona cya 28 mu mateka.
Ibitego bibiri Mayele yatsinze byahise bituma ayobora by’agateganyo urutonde rw’abamaze gutsinda ibitego byinshi aho amaze gutsinda 16, arusha kimwe George Mpole wa Dodoma Jiji.
Yanga kuri ubu ifite amanota 67 bidashoboka ko hari indi kipe yayagezaho ukurikije imikino isigaye ngo shampiyona irangire.
