Perezida Emmerson Mnangagwa wa Zimbabwe, akaba ari n’umukandida mu matora y’umukuru w’igihugu ateganyijwe kuwa 30 Nyakanga, kuri uyu wa Gatandatu yijeje abahinzi b’Abazungu ko batazamburwa ubutaka bwabo, abahamagarira gukorana na guverinoma.
Ku butegetsi bwa perezida Robert Mugabe, abahinzi benshi b’abazungu bambuwe amasambu yabo ahabwa abirabura uhereye mu 2000.
Kuva icyo gihe, umusaruro w’ubuhinzi Zimbabwe yabonaga watangiye kugabanyuka bikabije, abashoramari barahunga,ubushomeri butuma miliyoni nyinshi z’Abanyazimbabwe ziva mu gihugu zijya gushaka akazi.
Mu gihe habura iminsi mikeya ngo habe amatora ya mbere kuva Mugabe yava ku butegetsi, prezida Mnangagwa yahaye icyizere abahinzi b’abazungu nk’uko Jeune Afrique ivuga.
Perezida Mnangagwa akaba yabwiye abazungu n’abanyaziya babarirwa muri 200 ko ikibazo cyo kwigarurira ubutaka cyahise ubungubu amategeko agiye kubahirizwa.
Ati: “Ndavuga ko tugomba kurekeraho kuvuga ku bafite ibikingi hagendewe ku ibara. Ni icyaha kubivuga. Umuhinzi, umuhinzi wirabura, umuhinzi w’umuzungu, ni umuhinzi w’Umunyazimbabwe.”
Perezida wa Zimbabwe yashimangiye ko guverinoma ye itareba ibara ry’uruhu kandi ikeneye ubunararibonye bwa bose mu nzego zitandukanye z’ubukungu.
Abaturage b’uruhu rwera muri Zimbabwe bagabanyutseho 1% muri miliyoni 16 zari zituye Zimbabwe kuva politiki yo gusubiza ubutaka abirabura yatangira ku butegetsi bwa Mugabe.
Perezida Mnangagwa akaba yemeye ko iyi politiki ya Mugabe nta kigenda, ashimangira ko abazungu bari bafite uruhare rukomeye kubera ubunararibonye bwabo mu bijyanye n’ubuhinzi.
Yakomeje asaba abari bamuteze amatwi kugira uruhare mu kongera kubaka Zimbabwe. Ati: “Tugomba kubaka Zimbabwe twifuza. Turashaka kongera guha Zimbabwe uruhare rwayo rw’ikigega cy’ibyo kurya mu karere.”
Denis Nsengiyumva/ Bwiza.com
