Umunyapolitiki wo muri Zimbabwe, Luke Phibion Masamvu, wahoze ari umudepite uhagarariye Mutasa-North mu nteko, yapfuye ku myaka 62 y’amavuko azize Covid-19, ku itariki 30 Mutarama, asiga abagore be 12 n’abana 79.
Luke Phibion yari umunyemari n’umunyapolitiki uzwi cyane mu Ntara ya Marondera, Bindura na Manicaland.
Umuvugizi w’uyu muryango, akaba ari n’umuvandimwe wa nyakwigendera, John Masamvu, yatangarije ibinyamakuru bya leta ko uyu muryango washegeshwe n’urupfu rwe.
Icyo gihe yagize ati “ Ni umunsi w’agahinda ku muryango wose wa Masamvu. Sogokuru w’umuryango wanakoreye igihugu cye mu Nteko.”
Kuri uyu wa Gatandatu ushize kandi nk’uko byatangajwe na VOA, uwari Ambasaderi wa Zimbabwe muri Leta Zunze Ubumwe z’Abarabu, Jenthro Ndlovu, nawe yarapfuye nyuma y’igihe gito arwaye, nubwo hatatangajwe niba yarishwe na Coronavirus.
Minisiteri y’ubuzima muri Zimbabwe kuri uwo munsi, itariki 30 Mutarama, ikaba yaratangazaga ko abanyazimbabwe 33,273 banduye Covid-19, barimo 25,361 bakize n’abagera ku 1,193 bapfuye.
