Kuri uyu wa kabiri tariki ya 7, 2017 minisiteri y’imari n’igenamigamb yamurikiye Inteko ishinga amategeko uko raporo ku ngengo y’imari y’umwaka wa 2016/2017 yavuguruwe, ibyongewemo ndetse n’ibyakuwemo bitewe n’uko hari ibigo bishya byavutse, imishinga mwe n’imwe igomba kongerwamo imbaraga ngo irangire vuba n’ibindi.
Iyi raporo ivuguruye igaragaza impinduka z’ingenzi zikubiye mu mushinga w’itegeko rihindura kandi ryuzuza itegeko N°31/2016 ryo kuwa 30/06/2016, ikaba kandi yerekana ingengo y’imari igomba kugenerwa ibigo bishya biherutse gushyirwaho bisimbura ikigo cyari gishinzwe Umutungo Kamere, kwagura ibikorwa bya RWANDAIR n’ibindi.
[xyz-ihs snippet=”google-pub”]
Muri iyi raporo, amafaranga akomoka imbere mu gihugu, ateganyijwe kwiyongera kuva kuri Miliyari 1,182.4 kugera kuri Miliyari 1,186.3 Rw, naho inkunga ziva mu mahanga zikaba zizagabanuka kuva kuri Miliyari 365.3 z’amafaranga y’u Rwanda kugera kuri Miliyari 326.6Rwf
Naho ku byerekeye inguzanyo ziva mu mahanga zikaba ziziyongera kuva kuri Miliyari 367.7 z’amafaranga y’u Rwanda kugera kuri Miliyari 375.1
Uburyo amafaranga yo mu ngengo y’imari yasaranganyijwe
Miliyari 24.5 zizakoreshwa mu kohereza ingabo mubikorwa byo kubungabunga amahoro n’umutekano hirya no hino ku isi.
Miliyari 4.9 zizakoreshwa mu gutunga abagororwa naho Miliyari 1.8 zikaba zizakoreshwa mu bikorwa by’ibaruramibare bitandukanye biduha imibare ikoreshwa mu igenamigambi
Miliyari 1 yonyine, niyo izongerwa Komisiyo y’Amatora mu rwego rwo gutegura amatora ya Perezida wa Repubulika ateganyijwe mu minsi iri imbere, naho ingengo y’imari y’iterambere ikazava kuri Miliyari 785.7 ikagera kuri Miliyari 777.9
[xyz-ihs snippet=”google-pub”]
Miliyari 5 nizo zongerewe mu kigo cya RTDA agenewe kwishyura imisoro ijyanye no kubaka imihanda mu gihe Miliyari 1.5 agenewe kwishyura ingurane ku baturage bafite ibikorwa byangijwe no gukora imihanda hirya no hino mu gihugu.
Miliyari 2.7 yongerewe mu kigo gishinzwe Ingufu z’amashanyarazi EDC, naho Miliyari 2.5 niyo yongerewe Minisiteri y’ubuhinzi n’ubworozi, akaba azakoreshwa mu mushinga wo guhunika imyaka n’ibindi.
Miliyari 1.3 yongerewe Minisiteri y’umutungo kamere, mu mushinga wo gukomeza ubushakashatsi ku mutungo kamere watangiye.
Miliyoni 700 yongerewe Ikigo cya RAB agenewe kurangiza imirimo yo kubaka Ibibumbiro byo kuhira amatungo mu gihugu, mu gihe Miliyoni 420 gusa zongerewe CNLG aya mafaranga akaba agenewe kwihutisha umushinga wo kubika mu buryo bw’ikoranabuhanga inyandiko z’inkiko Gacaca.
Ingengo y’Imari yagenewe Ishoramari rya Leta (Net lending) izava kuri Miliyari 121.4 igere kuri Miliyari 142.3 naho inyongera ingana na Miliyari 24 yahawe ikaba ari yo yahawe Rwandair mu rwego rwo kwagura ibikorwa by’ubucuruzi harimo no kongera umubare w’indege mu gihugu.
[xyz-ihs snippet=”google-pub”]
Miliyari 11.5 yatanzwe nk’icyiciro cya mbere cyo kwishyura imigabane Leta ifite mu mushinga wo kubaka Ikibuga cy’Indege cya Bugesera.
Minisiteri y’imari n’igenamigambi yavuze ko amwe mu mafaranga azakoreshwa biteganyijwe ko azaturuka mu kugurisha imigabane ya Leta muri Banki ya I&M Bank Rwanda.
Kimwe n’ibindi bitavuzwe, ubu ni uburyo ingengo y’imari ivuguruye mu mwaka wa 2016/2017 igenwe na minisiteri y’Imari n’igenamigambi.
Kanda hano ujye ubona amakuru yihuse kandi kugihe kuri Facebook no kuri twitter
Nsengimana@Bwiza.com
