Perezida Allassane Ouattara wa Cote d’Ivoire kuri uyu wa Mbere yatangaje ko yagiriye imbabazi abantu bagera kuri 800 barimo Simone Gbagbo, umugore wa Laurent Gbagbo wahoze ayoboye iki gihugu bose bakaba bafunze.
Perezida Allassane Ouattara akaba yatangaje ko ibi byakozwe mu rwego rwo kongera kunywanisha abavandimwe nk’uko iyi nkuru dukesha VOA ikomeza ivuga.
Mu ijambo rye ryanyuze kuri televiziyo y’igihugu, Ouattara yatangaje ko Simone Gbagbo agiye kurekurwa vuba. Ni nyuma y’aho yari yaciriwe imyaka 20 y’igifungo. Umugabo we akaba yarayoboye Cote d’Ivoire kuva mu 2000 kugeza mu 2010.
Undi muntu uri muri aba bantu babariwe n’umukuru w’igihugu kuri uyu wa Mbere ni uwahoze ari minisitiri w’ingabo ku butegetsi bwa Gbagbo, Lida Kouassi, wahoze ari umuntu wa hafi wa Gbagbo wakatiwe gufungwa imyaka 15, ndetse n’uwahoze ari minisitiri ushinzwe imyubakire, Assoa Adou wari wakatiwe imyaka 4 y’igifungo mu 2017.
Laurnt Gbagbo wahoze ayoboye Cote d’Ivoire akaba amaze imyaka 7 afungiye mu Rukiko Mpuzamahanga Mpanabyaha rwa La Haye akurikiranweho ibyaha byakozwe mu bihe byakurikiye amatora yo mu 2010.
