Imirwano yatangiye mu gitondo cyo ku wa Kane tariki ya 14 Nzeri 2018, hagati y’inyeshyamba za FDLR n’abasirikare ba Leta ya Congo (FARDC) yahitanye ubuzima bw’abasivile babiri.
Ahagana saa kumi n’imwe z’igitondo (05:30) cyo ku wa 14 Nzeri 2014, ngo nibwo abasirikare ba Leta baguye mu gico cy’inyeshyamba za FDLR mu duce twa Bushenge, Budyuku na Bugoma, duherereye muri teritwari ya Rutshuru (Nord-Kivu), biba ngombwa ko bagenzi babo baturuka mu gace ka Rumangabo batanga ubufasha bwo kubasha gusubiza inyuma izo nyeshyamba.
Radiyo Okapi itangaza ko ubwo imirwano yari ikaze muri utwo duce, aribwo amasasu yafashe abasivile babiri, umugabo ukuze n’umwana w’imyaka 17, bahita bahasiga ubuzima.
Sosiyeti Sivile muri utu duce, itangaza ko abaturage batangiye gusubira mu ngo zabo, mu gihe abari batuye mu duce twa Bugomba, Bushenge na Buidyuku bose bari bavuye mu ngo bahunze iyo mirwano.
Ku wa 5 Kanama 2018, mu gace ka Rugari, Teritwari ya Rutshuru, nabwo abasivile babiri bahasize ubuzima abandi batatu barakomereka, ubwo FDLR yarwanaga na FARDC.
Imirwano ya FDLR na FARDC ikomeje mu bice bitandukanye bya Teritwari ya Rutshuru mu gihe muri iki gihugu cya Repubulika Iharanira Demokarasi ya Congo bategura amatora y’umukuru w’igihugu mu Ukuboza uyu mwaka, ikinyamakuru DW kikaba giherutse gutangaza ko mu kiganiro cyagiranye na bamwe mu banyapolitiki bo muri iki gihugu bagaragaje impungenge bafite ko ibi bikorwa by’umutekano muke bishobora kuyahungabanya.
