Umuyobozi w’umutwe wa Raia Mutomboki Kazimoto yishwe arashwe ubwo izi nyeshyamba zacakiranaga n’ingabo za FARDC kuwa Mbere ushize, itariki 17 Nzeri, mu gace ka Bamugaba muri Teritwari ya Shabunda muri Kivu y’Amajyepfo nk’uko byatangajwe na sosiyete sivile ya Shabunda. Ni mu mirwano yabereye ku muhanda Nduma-Nyambembe.
Uyu mukuru w’inyeshyamba wishwe yayoboraga igice cya Raia Mutomboki gikomeje guhungabanya umutekano mu biturage byinshi bya Bamuguba y’Amajyaruguru bigatuma abaturage bava mu byabo.
Amakuru atandukanye agera kuri Radio Okapi dukesha iyi nkuru aravuga ko uyu mutwe wa Raia Mutomboki Kazimoto ukorana n’indi mitwe nka raia Mutomboki Kasosoli na Kikwama yakomeje guhohotera abaturage bo mu gace ka Nkuni ku muhanda Lulingu-Nyambembe mu mezi ashize.
Umuyobozi wa Raia Mutomboki Kazimoto n’abarwanyi be ngo bitoreje mu majyaruguru ya Teritwari ya Shabunda, bavuga ko barwanira gukumira kwigarurirwa kw’ubutaka bw’abaturage bikozwe na Pariki y’igihugu ya Kahuzi-Biega. Uyu mutwe ukaba wari unaherutse gushimuta abakozi b’iyi pariki ubamarana iminsi myinshi mbere yo kubarekura.
Amakuru aturuka mu gisirikare yo aremeza ko igisirikare cyakoze ibikorwa bya gisirikare muri icyo gice, ariko nta makuru arambuye ku rupfu rw’uyu mukuru w’inyeshyamba z’umutwe wa Raia Mutomboki Kazimoto cyatanze.
