Nyuma yaho Hon. Rwasa Agathon atangarije ko yashinze ishyaka rishya aryita FNL ( Front National de Liberté ) hari hasanzwe hari irindi rya FNL ( Front National de Liberation ), abayobozi b’irisanzwe barasaba Leta kutazaryemera.
Umuyobozi wa FNL yari isanzweho, Jacques Bigirimana avuga ko iri shyaka rishya rya Agathon Rwasa ridakwiye kwemerwa na Leta, ashimangira ko izina n’ibirango ari iby’ishyaka ryabo ryari risanzwe.
Mu kiganiro yagiranye n’abanyamakuru ku wa Mbere tariki ya 24 Nzeri 2018, Bigirimana yatangaje ko basaba Minisiteri y’umutekano w’igihugu imbere kutazaha uburenganzira iri shyaka bwo gukora nk’iryemewe mu gihugu.
Ati “Minisiteri y’umutekano w’igihugu imbere ntizemerere Agathon Rwasa ibyo yasabye, gusa izamusubize ko ibyo yasabye ari imfabusa”.
Bigirimana akomeza avuga ko mu gihe cyose iyi Minisiteri izasuzuma igasanga ibirango by’aya mashyaka bidasa bazemera imyanzuro izaba yafashwe, ariko agashimangira ko Agathon yabikoze nkana abizi kandi abishaka, ko amazina yakoresheje n’ibirango, ari ibya FNL isanzwe yemewe nk’ishyaka rya Politiki mu Burundi.
Ku wa Gatatu tariki ya 12 Nzeri 2018, mu nama yakoresheje yari yitabiriwe n’abayoboke be mu mujyi wa Bujumbura, nibwo Hon Agathon Rwasa yatangaje ko afite irindi shyaka rya politiki, FNL (Front National de Liberté) anatangaza ko ritandukanye n’irisanzwe.
Yagize ati “Ishyaka tugomba gushinga ntirigomba kwitiranwa na gato n’iryari risanzwe rya FNL, twebwe ni ‘Front National de Liberté, mu gihe abandi ari ‘Forces Nationales de Liberation’, ntibisa keretse abashaka kubikoresha mu zindi mvugo”.
Hon Agathon Rwasa ni umunyapolitiki utavuga rumwe na Leta y’u Burundi, akaba ari Visi Perezida w’Inteko Ishinga Amategeko.
