Ku mugoroba wo ku wa Kane tariki ya 4 Ukwakira 2018, abanyeshuri biga muri ‘College Adventiste de Gitwe’ bigaragambije bashinja umuyobozi w’ikigo, Ndayisenga Wilton kubakubita.
Abanyeshuri basaga 150, basohotse mu kigo, bafata umuhanda berekeza ku karere ka Ruhango, bavugaga ko bagiye gushaka ubuyobozi bw’akarere ngo bubakemurire ikibazo, bashimangira ko ari icy’inkoni bakubitwa na diregiteri n’ibindi.
Aba banyeshuri bosohotse mu kigo n’ibikapu byabo ndetse n’ibyo baryamaho, bakaba batangarije ubuyobozi bw’akarere ibibazo basanzwe bafitanye n’ubuyobozi bw’ikigo, ikibazo gishakirwa umuti baratuza.
Nk’uko umuseke ubitangaza, ngo umuyobozi w’akarere akimara kumva ko abanyeshuri bari mu nzira bagana ku biro bye, yahise abasanganira bahurira mu nzira, bagirana ibiganiro basubira mu kigo.
Yatangarije iki kinyamakuru ko mu biganiro yagiranye n’aba banyeshuri, bamutangarije ko umuyobozi wabo, Ndayisenga abakubita, ikindi ngo abiga muri TVET batagira ibikoresho.
Mu kiganiro yagiranye n’ubuyobozi bw’itorero ry’Abadiventiste b’Umunsi wa Karindwi bw’i Gitwe, ari nabwo bufite iki kigo mu nshingano, bwemera ko bugiye gukemura ibibazo abanyeshuri bagaragaje birebwa nabwo.
Meya Habarurema Valens atangaza kandi ko ibyo abanyeshuri bavuga birebana no gukubitwa bigiye gukorerwa iperereza, basanga aribyo, ibirego bigashikirizwa Urwego rw’Igihugu rushinzwe Ubugenzacyaha (RIB). Ko gukubita umunyeshuri bitemewe.
Umuyobozi w’ikigo, Ndayisenga Wilton bivugwa ko yaba yanahagaritswe ku kazi, yatangaje ko iyo myigaragambyo yakuruwe n’umunyeshuri umwe yari yatse telefoni, amwirukanye yanga gutaha ashishikariza n’abandi kwigaragambya.
