Inyeshyamba za ADF/Nalu zikomoka muri Uganda, zishe abasirikare bane ba Leta ya Congo/Kinshasa i Paida, agace kari muri Teritwari ya Beni (Nord-Kivu) .
Aba basirikare bishwe ku wa kane tariki ya 4 Ukwakira 2018, ubwo izi nyeshyamba zakozanyagaho n’abasirikare ba Leta.
Nk’uko Radiyo Okapi ibitangaza, ngo izi nyeshyamba za ADF, zagabye ibitero ku birindiro bya FARDC, mu gace ka Painda, kari mu bilometero 5 uvuye mu mujyi wa Beni.
Zigaba ibi bitero, ngo abajenerali bane bari mu nama, barimo umugaba mukuru w’ingabo zirwanira ku butaka, hamwe n’abandi batatu bayobora urugamba rwo guhashya inyeshyamba muri Kivu y’Amajyaruguru.
Izi nyeshyamba ngo zikaba zarashakaga kugera aho aba bayobozi bakoreraga inama, zisubizwa inyuma n’abasirikare ba Leta, mu mirwano yamaze iminota isaga 30.
Nk’uko iki kinyamakuru kibitangaza, ngo abasirikare bane ba Leta bahasize ubuzima barimo umwe wari ufite ipeti rya majoro, andi makuru akavuga ko bashobora kuba ari abantu umunani bahasize ubuzima barimo abasivile babiri.
Inyeshyamba za ADF zikomoka muri Uganda, zimaze imyaka isaga 20 zirwanira mu mashyamba ya Congo, zikaba zarigaruriye agace ka Beni, aho zica urubozo abaturage zikoresheje intwaro za gakondo,….
