Umuyobozi w’akanama ka Loni gashinzwe uburenganzira bw’ikiremwamuntu, Michelle Bachelet yagaragaje ishavu n’agahinda yatewe n’uhagarariye u Burundi muri Loni ugereranya umukuru w’akanama gakora iperereza mu Burundi nk’igikoresho cy’abandi.
Nk’uko bitangazwa na Reuters, uhagarariye u Burundi mu Loni, Albert Shingiro, avugira mu nama ya Loni, ku wa Gatatu tariki ya 24 Ukwakira 2018, yikomye raporo yashyizwe hanze n’akanama ka Loni gashinzwe iperereza mu Burundi.
Abicishije ku rukuta rwe rwa Twitter, Shingiro yise umukuru w’akanama gashinzwe iperereza mu Burundi, umunya-Senegal Doudou Diène “Umunyafurika wahawe akazi ko kugurisha igihugu cya Afurika”.
Mu itangazo yashyize hanze na Bachelet, yavuze ko “ibyo yavuze biteye agahinda haba mu buryo yabitangajemo ndetse n’ibibikubiyemo”.
Akanama gashinzwe iperereza mu Burundi kayobowe na Diène kashyizweho mu 2016, kakaba karasohoye icyegeranyo cy’impapuro 272 mu ntangiriro z’uyu mwaka, kivuga ko Leta y’u Burundi n’abayishyigikiye bakoze ibyaha byibasiye inyokomuntu.
Uburundi bwise icyo cyegeranyo ko ari icy'”ibinyoma”, bunateguza gukurikirana mu butabera abakigizemo uruhare barimo n’abagize ako kanama batatu.
Bachelet yavuze ati: “Gutera ubwoba bwo gukurikirana abagize ako kanama kubera igikorwa bakoze babisabwe n’akanama ka Loni gashinzwe uburenganzira bwa muntu kamwe mu bigize Umuryango w’Abibumbye, birababaje bikaba bikwiye ko basokora iyi myitwarire”.
Yakomeje agira ati: “Hanyuma, kwifatira mu gahanga umukuru w’ako kanama, Doudou Diène, bakamugereranya n’umuhakwa ni ibiteye isoni”.
Kuva haba igikorwa cyo kugerageza guhirika ubutegetsi bw’u Burundi muri Gicurasi 2015, Leta y’u Burundi yagiye ishinjwa guhutaza uburenganzira bwa muntu, yica, ifunga mu buryo bunyuranyije n’amategeko n’ibindi. Ibi ngo bikaba bigirwamo uruhare n’urubyiruko rw’Imbonerakure zibasira cyane abatavuga rumwe na Leta zifatanyije na bamwe mu bagize inzego z’umutekano.
[penci_related_posts taxonomies=”undefined” title=”Inline Related Posts” background=”” border=”” thumbright=”no” number=”4″ style=”grid” align=”none” displayby=”recent_posts” orderby=”random”]
