Abahoze ari abarwanyi b’inyeshyamba za FDLR, bashyize intwaro hasi bakaba bacumbikiwe mu nkambi by’agateganyi i Kisangani baricwa n’inzara mu gihe basabwa gutaha iwabo mu Rwanda.
Mu mwaka wa 2014, nibwo aba barwanyi bemeye gushyira intwaro hasi, bacumbikirwa mu nkambi ya Bahuma iri i Kisangani mu Burasirazuba bwa Repubulika Iharanira Demokarasi ya Congo. Intego yari iyo gushakirwa ahandi baba cyangwa bagacyurwa mu Rwanda.
Nyuma y’imyaka ine bari muri iyo nkambi, bavuga ko Leta ya Congo yababwiye ko bagomba kuba bavuye ku butaka bwayo bitarenze ku wa 20 Ukwakira 2018. Nyuma y’iyi tariki bakaba barafungiwe amazi n’umuriro.
Bo bavuga ko badashobora gutahuka ngo kuko umutekano wabo mu Rwanda utizewe, mu gihe bavuga ko bafite amakuru y’uko bagenzi babo batahutse ngo bamwe bishwe, abandi barafungwa mu gihe ngo hari n’abasubiye muri Congo.
Uhagarariye iyi miryango, Mugisha Faustin aganira na BBC avuga ko abahoze ari abarwanyi ba FDLR n’imiryango yabo bari muri iyi nkambi basaga 800. Ngo bakaba babayeho nabi cyane.
Ati “Tubayeho nabi cyane, ntituvurwa, amazi dutunzwe n’ay’imvura, ibyo kurya baduhaga byashize ku wa 23 z’ukwezi kwa Cyenda, abantu bamerewe nabi rwose,…”
Bari babayeho gute?
Bakigezwa mu nkambi ya Bahuma, ingabo za Monusco zasabwe na Leta ya Congo kuba zibafashije, zibaha ibifungurwa, amazi hamwe n’imiti by’agateganyo, ubu ngo ikaba yarabafungiye amazi n’umuriro.
Leta ya Congo ivuga ko umuti nta wundi uretse gutaha mu gihugu cyabo, umuvugizi wa Leta, Lambert Mende akaba avuga ko aba yita ‘Abicanyi’ nta burenganzira bafite muri Congo, ko nta kindi basabwa uretse gutaha mu Rwanda.
Agira ati “Ubwicanyi no gufata abagore ku ngufu mu Burasirazuba ya Congo byazanywe n’abo barwanyi baje bamajije gukora amahano mu gihugu cyabo”.
Babwirwa gutaha iwabo mu Rwanda, ariko bo bakavuga ko umutekano wabo utizewe, kandi ko hari n’abatahutse nyuma bakongera guhunga. Aya ngo akaba yaba ari amakuru bahabwa n’abadashaka ko bataha, kuko ibihumbi by’abageze mu Rwanda bashima uburyo bakiriwe ndetse n’uburyo umutekano ari ntamakemwa.
Aba bahoze ari abarwanyi ba FDLR bagizwe n’abahoze mu gisirikare cy’u Rwanda (FAR), bahungira muri Congo nyuma ya Jenoside yakorewe Abatutsu mu 1994, ubwo FPR/Inkotanyi yari imaze gufata ubutegetsi. Bose hamwe ni abantu 850, barimo 200 bahoze ari abarwanyi ba FDLR n’imiryango yabo igizwe na 650.
[penci_related_posts taxonomies=”undefined” title=”Inline Related Posts” background=”” border=”” thumbright=”no” number=”4″ style=”grid” align=”none” displayby=”recent_posts” orderby=”random”]
