Abahoze ari abarwanashyaka b’ishyaka riri ku butegetsi mu Burundi, CNDD-FDD birukanwe mu ishyaka bakaba bari bariyise Abaryumyeho (Abaryumyeko), ubu bakaba barashinze ishyaka ryabo ryitwa PPD GIRIJAMBO, batangaje ko iryo shyaka ryabo riri mu ihuriro CNARED. Iryo shyaka rikaba riyobowe na Leonidas Hatungimana wahoze ari umuvugizi wa perezida Pierre Nkurunziza.
Mu ibaruwa yandikiye perezida wa CNARED, Leonidas Hatungimana yamumenyesheje ko iryo shyaka rye ryashinzwe kugirango rishobore kwegeranya no gutunganya neza ibikorwa bya politiki by’abahoze ari abarwanashyaka ba CNDD-FDD bamaganye manda ya gatatu ya perezida Nkurunziza.
Iri shyaka rivuga ko riri mu ihuriro CNARED, kandi rishyigikiye ibitekerezo by’iri huriro rihuriyemo abatavuga rumwe n’ubutegetsi bwa Nkurunziza nk’uko urubuga rwo mu Burundi, Ubmnews dukesha iyi nkuru rukomeza ruvuga .
Nk’uko Leonidas yabitangaje, iryo shyaka ryashinzwe nyuma y’aho bibonekeye ko uko igihugu kiyobowe, uko abantu babayeho, bagasanga ahari uri ku butegetsi ari we Murundi wenyine, abatowe bakigabanya umutungo w’igihugu ku nyungu zabo n’imiryango yabo, utari kumwe nabo agafatwa nk’aho atari Umurundi.
Mu ishyaka PPD Girijambo rero ngo bazaharanira ko imishinga y’iterambere ry’igihugu ikorwa ku nyungu za bose, umuntu wese agasubizwa ijambo, umuturage akabaho atekanye atikanga ko ejo azagirirwa nabi abantu ntibabeho nk’inyamanswa.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
