Yifashishije abavoka batatu, imiryango 60 y’abarundi yatanze ikirego mu rukiko mpuzamahanga mpanabyaha rwa ICC ruri I La Haye ndetse no mu kanama ka ONU gashinzwe umutekano barega Perezida Nkurunziza n’igihugu ayoboye kuba barishe abantu muri iyi miryango ndetse bakaba baranahungabanyije uburenganzira bwa muntu.
Nk’uko byatangajwe n’ibinyamakuru bitandukanye byandikirwa mu mu Burundi ndetse na IB Times, ikinyamakuru cyandikirwa mu Bwongereza ngo iyi miryango 60 yajyanye ikirego gisa nk’aho ari kimwe muri rusange kuko yagiye kurega leta na Perezida Pierre Nkurunziza ubwicanyi ndengakamere yakoreye imiryango yabo kuva muri Gicurasi 2015 kugeza ubu agikora.
Ikinyamakuru IB Times cyo kivuga ko iyi miryango yifashishije abanyamategeko 3 barimo Armel Niyongere w’umurundi, Leon Lef Forster w’umufaransa na Bernard Maingain w’Umubiligi.
Aba banyamategeko bakaba barahawe inshingano zo kuburanira iyi miryango 60 yabuze ababo guhera mu ntangiriro z’ukwezi kwa Gatanu 2015.
Maitre Bernard Maingain ari nawe uyoboye bagenzi be yabwiye ikinyamakuru Bishasha.com cyandikirwa mu Burundi ko iki kirego gitanzwe ari intambwe ikomeye ku miryango y’abarundi bose baburiye ababo mu myiryane u Burundi bumazemo iminsi.
Yasabye urukiko Mpuzamahanga mpanabyaha ICC ( International Criminal Court) hamwe n’akanama k’umuryango w’abibumbye ONU gashinzwe uburenganzira bwa muntu kwita ku birego by’iyi miryango kugira ngo abakoze ubwicanyi ndengakamere babuhanirwe.
Iki kirego cy’imiryango 60 kugeza cyamaze kugera muri ICC abacamanza b’uru rukiko bakaba bavuga ko bari kugisuzuma mu minsi iri imbere kigatangira kuburanishwa.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
