Ingabo z’Umuryango w’Abibumbye zigera ku munani zikomoka mu gihugu cya Tchad mu gitondo cyo kuri iki Cyumweru ziciwe muri kimwe mu bitero bikomeye ku ngabo za Loni mu gihugu cya Mali.
Ni igitero cyagabwe ku ngabo za Loni zikomoka muri Tchad zifite ibirindiro ahitwa Aguelhok, mu majyaruguru y’uburasirazuba bw’igihugu, mu birometero 200 uvuye ku mupaka wa Algeria.
Izi ngabo za Loni zabashije gusubiza inyuma igitero cyagabwe n’abarwanyi bari mu modoka nyinshi n’ibikoresho bikomeye nk’uko byasobanuwe n’ubutumwa bwa Loni bwo kugarura amahoro muri Mali (MINUSMA).
Nubwo babashije guca integer umwanzi ndetse bakamukurikirana asubira inyuma, abasirikare ba Loni nabo batakaje bagenzi babo benshi, aho imibare y’agateganyo ivuga ko hapfuyemo 8 abandi benshi babarirwa muri 20 bagakomereka nk’uko byatangajwe n’inzego z’umutekano za Mali.
Iki gitero cyo ku Cyuumweru nk’uko iyi nkuru dukesha Jeune Afrique ikomeza ivuga, ni kimwe mu byahitanye ingabo z’Umuryango w’Abibumbye nyinshi mu gihugu cya Mali gikomeje kwibasirwa n’ibitero by’abarwanyi b’abasilamu bavuga ko barwana intambara ntagatifu (Jihad).
Kuva MINUSMA yatangizwa mu 2013 n’abasirikare 12,500 n’abapolisi, yari imaze gutakaza kugeza ubu abasirikare bagera ku 160, barimo abagera ku 100 bagiye bicirwa mu mirwano ikomeye.
Igitero cyaherukaga gutwara ingabo za Loni nyinshi icya rimwe giheruka mu 2014 ubwo hicwaga abagera ku icyenda mu basirikare ba Niger ubwo uruhererekane rw’imodoka zabo rwagabwagaho igitero muri Gao, ho mu majyaruguru y’uburasirazuba.
Usibye aba, abandi basirikare batanu ba Loni bakomoka muri Togo barishwe muri Gicurasi 2016, Abanya-Guinea 7 bishwe muri Gashyantare 2016, abakomoka muri Burkkina-Faso batandatu nabo bishwe muri Nyakanga 2015. Ni mu gihe Abanya-Tchad bandi batanu bari bishwe muri Nzeri 2014 ubwo baturitswaga na mine, abandi batanu nabo baza kwicirwa mu mujyi wa Aguelhoc muri Nzeri 2014, abandi batanu nabo bacirwa mu gico muri Gicurasi 2016. Muri rusange ingabo za Tchad akaba ari zo zikomeje kwibasirwa n’ibitero bigabwa ku ngabo za Loni muri Mali.
