Abasirikare batatu ba Repubulika iharanira Demokarasi ya Congo bishwe ubwo batanaga mu mitwe na ba rushimusi b’abanyamahanga bazwi ku izina rya Woudas. Ubu bushyamirane bukaba bwarabaye kuwa Gatanu ushize ahitwa Ngilima mu birometero 45 mu burengerazuba bwa Dungu mu Ntara ya Haut-Uele.
Amakuru aturuka aha hantu aravuga ko, abasirikare ba FARDC bari mu irondo baguye mu gico cyari cyatezwe n’abo ba rushimusi. Icyakurikiyeho ni ukurasana hagati y’impande zombi abantu batatu barahagwa ndetse umwe arakomereka ku ruhande rwa FARDC.
Babiri muri abo ba rushimusi nabo ngo bahasize ubuzima ariko imirambo yabo ijyanwa na benewabo nk’uko amakuru yakomeje kugera kuri Radio Okapi dukesha iyi nkuru avuga.
Uwo musirikare wakomeretse we yajyanywe mu Bitaro bya Dungu kuwa Gatandatu mbere yo kujyanwa i Bunia ngo abe ariho akomeza kuvurirwa, mu gihe abapfuye bashyinguwe aho ngaho i Ngilima.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
