Kuva muri Gashyantare 2015, nibwo bwa mbere ingabo za MONUSCO zarashe ku nyeshyamba za ADF/Nalu zikomoka muri Uganda zikaba zihungabanya umutekano wa Congo.
Kuri uyu wa Gatatu tariki ya 30 Werurwe nibwo indege ya kajugujugu yarashe amasasu ku nkambi ya Semuliki ikambitsemo izi nyeshyamba za ADF iherereye hafi n’Ubugande, ibyangije bikaba bitaratangazwa nk’uko ikinyamakuru redpapper kibitangaza.
Izi nyeshyamba zagiye zishinjwa ibikorwa by’ubwicanyi cyane cyane mu gace ka Beni ho muri RDC, zikica abaturage zikoresheje intwaro za gakondo(imihoro,…), kuva muri 2014 zikaba zishinjwa kwica abasaga 500.
Hashize imyaka isaga 20 izi nyeshyamba zirwanira mu mashyamba ya Congo, zikaba zariremye umutwe wa gisirikare zirwanya Perezida Museveni uyoboye Uganda kuva mu 1986.
Muri Gashyantare 2015, Ingabo za Monusco zari zarivanye mu bitero zari zifatanyije n’ingabo za Leta ya Congo, ibitero byo guhashya inyeshyamba (FDLR,ADF,…), Monusco ikaba yaratangaje ko ihagaritse ibitero kubera abasirikare 2 b’abajenerali ba FARDC bashinjwaga ibyaha byo guhohotera uburenganzirwa bw’ikiremwamuntu.
Mu ruzinduko rw’umunyamabanga mukuru muri Loni, Ban Ki Moon yagiriye muri Congo mu kwezi gushize, yasabye izi ngabo za MONUSCO kongera gufatanya na FARDC, ibi bikaba aribyo byatangiye gushyirwa mu bikorwa.
Théoneste Itangishatse/Bwiza.com
