Minisitiri w’ubutegetsi bw’igihugu, Shyaka Anastase, arasaba abayobozi b’uturere n’umujyi wa Kigali guca umuco w’itekinika no kurandura ruswa ahubwo bakibanda ku gukemura ibibazo by’abaturage.
Ibi minisitiri Shyaka Anastase yabitangaje kuri iki Cyumweru itariki 17 Gashyantare ubwo yasozaga umwiherero w’iminsi ibiri w’abayobozi b’Uturere (Mayors) n’Umujyi wa Kigali wari ugamije kwisuzuma no gusangira ubunararibonye waberaga mu Karere ka Rwamagana.
Yabasabye kurandura ruswa n’indi mikorere mibi mu nzego z’ibanze; Guca burundu umuco mubi wo gutekinika; kubakira Serivise ku baturage hibandwa ku gukemura ibibazo byabo; no kwigira kuri gahunda nziza ziri mu turere tumwe na tumwe hagamijwe kwihutisha iterambere.
Aha i Rwamagana, abayobozi b’uturere bari muri uyu mwiherero bari kumwe na Meya wa Kigali na ba guverineri baboneyeho gusura Icyumba Ntangamakuru gitanga amakuru y’uburyo akarere kagenda gacyemura ibibazo byari byugarije abaturage.
Iki cyumba ntangamakuru kinagaragaza uburyo imihigo ishyirwa mu bikorwa n’aho igeze yeswa(Imihigo Implementation progress) ndetse na gahunda yo kwihaza mu biribwa (Food security).
Umuyobozi w’Akarere ka Rwamagana, Mbonyumuvunyi Radjabu, yabwiye aba bashyitsi ko mbere yo gucyemura ibibazo byari bibangamiye umudendezo w’abaturage, habanje gukusanywa amakuru yose uhereye ku rwego rw’umudugudu (Profiling) kandi buri rwego rusinyira ko amakuru yatanzwe ari ukuri.
