Abayobozi b’imitwe ya politiki yibumbiye mu ihuriro FCC (Front commun pour le Congo) kuri uyu wa Gatatu, itariki 20 Gashyantare, bashyize umukono ku masezerano yo gukomeza kuba abizerwa kuri Joseph Kabila wahoze ayoboye iki gihugu ndetse no kumwubaha nk’umuyobozi w’iri huriro.
Ihuriro FCC niryo rifite abadepite benshi mu nteko ishinga amategeko ndetse n’abo ku rwego rw’intara zigize igihugu.
Abayoboye iri huriro bakaba biyemeje gukomeza gukorera hamwe no gufatanya bayobowe na Joseph Kabila uherutse guha ubuyobozi bwa Repubulika iharanira Demokarasi ya Congo Felix Tshisekedi watsinze amatora y’umukuru w’igihugu yo kuwa 30 Ukuboza 2018.
Nubwo iri huriro rya FCC ryari rihagarariwe n’umukandida Emmanuel Ramazani Shadary atari ryo ryatsinze amatora y’umukuru w’igihugu akegukanwa n’ihuriro ritavuga rumwe n’ubutegetsi, ntibyaribujije kugumana imyanya myinshi mu nteko ishinga amategeko no mu badepite b’intara zigize igihugu.
Abagize ihuriro FCC rero nk’uko tubikesha Radio Okapi bakaba batangaje ko bagiye gushyiraho uburyo bw’imikorere buhuriweho mu nzego zose, kureshya indi mitwe ya politiki muri iri huriro, kwirinda kuvangira abo bahuriye mu ihuriro no kubaha ibyemezo by’inzego z’ihuriro.
