Urukiko Rwisumbuye rwa Ngoma rwaburanishije urubanza ruregwamo Rukundo Juliette bita Mama Witonze, Nzabagerageza Jean D’amour bita Toto na Twagirayezu Julien bita Mafene  ku cyaha cy’Ubwicanyi buturutse ku bushake bwakorewe uwitwa Sibomana Jean de Dieu barangije baramubaga, kuri buri wese Ubushinjacyaha bukaba bwaramusabiye igihano cy’igifungo cya burundu.
Uru rubanza rwaburanishirijwe imbere y’imbaga y’abaturage aho icyaha cyabereye mu mudugudu wa Rama, mu Kagali ka Nyankurazo, mu Murenge wa Kigarama, mu Karere ka Kirehe, Intara y’Iburasirazuba Ku wa 26 werurwe 2019.
Rukundo Juliette, Nzabagerageza Jean d’Amour na Twagirayezu Julien baregwa kuba ku itariki ya 04 Werurwe 2018 mu gihe cya saa kumi n’imwe za nimugoroba, barishe Sibomana Jean de Dieu babanje kumunigisha umugozi biborohera kumuteragura ibyuma mu mutima kugeza apfuye nk’uko iyi nkuru dukesha Ubushinjacyaha Bukuru ivuga.
Mu rwego rwo gusibanganya ibimenyetso, bafashe umurambo bawushyira mu mufuka barawikorera bawutwara ku Rutare bawutwikisha essence, babonye udakongotse, bawucamo ibice bitatu amaguru yombi bayahamba ukwayo igihimba n’ibindi bisigaye babijugunya mu musarani.
Uru rubanza razasomerwa aho rwaburanishirijwe ku itariki ya 05 Mata 2019
