Imyigaragambyo yadutse mu Gace k’Ubucuruzi (CBD) ka Nairobi kuri uyu wa Gatanu, itariki ya 28 Kanama, ubwo abacuruzi bato binjiraga mu mihanda bamagana icyo bise “izamuka ry’imisoro ridafite ishingiro ryakozwe n’Ikigo cy’Imisoro cya Kenya (KRA)”, igipolisi kikaba cyakoresheje ibyuka biryani mu maso mu gutatanya abigaragambya.
Aba bacuruzi batangiye imyigaragambyo yabo bava i Kamukunji mbere yo kunyura ku muhanda wa Moi Avenue berekeza ku biro bya KRA biri kuri Time Tower, bahagarika ibikorwa bisanzwe by’ubucuruzi mu mujyi rwagati.
Amashusho yagiye ahagaragara yerekana abacuruzi bafite ibyapa bavuza vuvuzela ubwo banyuraga mu mihanda, imyigaragambyo ikaba yatumye ibikorwa mu bice bimwe na bimwe bya mu gace k’ubucuruzi bihagarara.
Ubwo imyigaragambyo yakomezaga gufata intera, abapolisi bari baryamiye amajanja batangiye gutera imyuka iryana mu maso kugira ngo batatanye abacuruzi bato ku muhanda ugana ku nteko ishinga amategeko na Kenyatta Avenue.
Ubwo bushyamirane bwahagaritse urujya n’uruza rw’abantu n’ubwikorezi mu mihanda yombi ubwo abacuruzi bakomezaga urugendo rwabo berekeza ku biro bya KRA biri kuri Time Tower.
Ibigo byinshi by’ubucuruzi byakomeje gufunga mu gihe cy’imyigaragambyo ubwo abacuruzi binjiraga mu myigaragambyo kugira ngo bagaragaze ko batemera ingamba zigezweho zo gusora no gusaba ko leta igira icyo ikora nk’uko tubikesha kenyans.co.ke.
Abacuruzi baramagana cyane cyane icyemezo cya KRA cyo kuzamura igipimo ntarengwa cy’imisoro ku mizigo rusange ihujwe kuva kuri miliyoni 2.5 kugera kuri miliyoni 3.2 z’amashilingi ya Kenya.
Igipimo gishya, cyatangiye gushyirwa mu bikorwa ku itariki ya 20 Kanama 2026, cyerekana ko hiyongereyeho Ksh 700.000 kandi cyateje abacuruzi kubyamagana bikomeye.
Aba bacuruzi bavuga ko iyi nyongera y’imisoro izashyira umutwaro w’inyongera ku bucuruzi buto, cyane cyane abatumiza ibicuruzwa mu mahanga basanzwe bahanganye n’izamuka ry’ibiciro by’imikorere.
Barasaba guverinoma kongera gusuzuma iki gipimo gishya, batanga umuburo ko kuzamura imisoro bishobora kongera ikiguzi cyo gutumiza ibicuruzwa mu mahanga ndetse amaherezo n’igiciro cy’ibicuruzwa kikazamuka.
