Ishyaka CNDD-FDD ryahamagariye Abarundi bari mu buhunzi gutaha mu gihugu cyabo ribizeza amahoro n’umutekano, gusa bamwe mu banyapolitiki bakemeza ko nta bihari ahubwo ko ubwicanyi bukomeje gukorwa na Leta.
Frederic Bamvuginyumvira wahoze ari icyegera cya mbere cy’umukuru w’igihugu, avuga ko Leta yakagombye kubanza gukemura ibibazo bya politiki abahunze bagataha mbere y’uko amatora aba, by’umwihariko agashimangira ko hari abicwa bahorwa kutavuga rumwe na Leta.
Aganira na BBC yatanze ingero za bamwe mu bayoboke b’ishyaka CNL rya Agathon Rwasa bakubitwa, bagashimutwa abandi bakicwa, ko ari ikimenyetso cyerekana ko umutekano mu Burundi udahari.
Yagize ati “Icyo nsaba ni uko ubu bwicanyi tutongera kubwumva, izi mvugo mbi z’abategetsi tudasubira kuzumva, muri Komini Butihinda hari abantu bakubiswe n’Imbonerakure babajyana kwa muganda bagera kuri batandatu babiri bahita bapfa, barakubiswe babajyana kwa muganda ari intere, ubwo se si ubwicanyi?
Yakomeje asaba ko Leta y’u Burundi yabanza ikicarana n’abatavuga rumwe nayo, bakumvikana ubundi amatora akazakorwa impande zombi ziyavugaho rumwe.
Agaruka ku mutekano w’abatavuga rumwe nayo, avuga ko kuba na Agathon Rwasa, Visi Perezida w’Inteko Nshingamategeko, akiri mu gihugu, abiterwa no kubura aho ajya. Ati “Kuba mu gihugu ni ukubura uko agira, none yajya he? Iyo agira iyo ajya aba yaragiye”.
Mu majambo yavugiwe mu birori byo kwizihiza imyaka ine ishize Perezida Nkurunziza ayoboye manda ya Gatatu, ubuyobozi bwa CNDD FDD niho bwashimye ukuntu igihugu gitekanye, nyuma y’akajagari kavutse mu 2015, harimo no kugerageza guhirika ubutegetsi, niho rihera risaba abahunze gutahuka.
Ku bwa Bamvuginyumvira ukiri mu buhunzi mu gihugu cy’u Bubiligi, avuga ko abahungutse bari baragiye mu butembere, ko bamwe bagiye banagenda ntawe ubuhiga, ku bwe akavuga ko icyo yahunze n’ubundi kitarabonerwa umuti.
