Mu ijoro ryo kuri uyu wa Gatandatu ushize, mu Nkambi y’impunzi z’Abarundi ya Nyarugusu mu gihugu cya Tanzania humvikanye amasasu muri zone ya 8. Amakuru aturuka aha aravuga ko bushobora kuba ari ubujura.
Amasasu yumvikanye iminota igera kuri 20 bituma impunzi zitahwa n’ubwoba nk’uko iyi nkuru dukesha SOSMediasBurundi ikomeza ivuga.
Amakuru akaba avuga koumucuruzi witwa Bahati, ukora mu bijyanye no guhererekanya amafaranga kuri telephone, ari we watewe. Umuntu umwe yakomeretse ajyanwa ku bitaro.
Nyuma y’iki gitero ngo impunzi zabonye agatsiko k’abantu barindwi muri zone ya 12 muri iyi nkambi ya Nyarugusu, bamwe bafite imbunda kandi bavuga Ikirundi.
Abantu bane bakekwa hagati aho batawe muri yombi.
Biravugwa ko muri iyi Nkambi Nyarugusu hamaze iminsi hari icyoba nyuma y’aho impunzi zitangarije ko zabonye abantu bitwaje intwaro mu masaha ya nijoro bazenguruka. Icyo gihe igipolisi cyarabimenyeshejwe ndetse hatangira gukorwa amarondo.
