Abagize inteko ishinga amategeko y’Umuryango wa Afurika y’Iburasirazuba (EALA) basabye Umuryango w’Ubumwe bw’u Burayi gukuraho ibihano byafatiwe u Burundi.
Umwe muri aba ukomoka mu gihugu cya Kenya yavuze ko ibihano Ubumwe bw’u Burayi bwafatiye u Burundi kuva mu 2015 ari uburyo bwo gukomeza ubukoloni bugezweho.
Mu kiganiro yagiranye n’ikinyamakuru The Citizen, uyu mudepite yagize ati: “Ibihano byafatiwe u Burundi ntibyumvikana kubera ko bishingiye ku mpamvu zidafatika. U Burundi nk’ikindi gihugu gikwiye kugira ubwigenge bwacyo.”
Abagize EALA bavuga ko batangazwa n’uko EAC yinumiye aho guhagurukira Ubumwe bw’u Burayi ngo bukureho ibihano bwafatiye u Burundi kuva mu 2015.
Aba bakaba batangaje ko ibihano byafatiwe u Burundi birimo biratuma kimwe mu bihugu bigize EAC gihungabana mu bijyanye n’ubukungu.
