Imfungwa 21 zishinjwa kugira uruhare mu igerageza rya Coup d’Etat mu Burundi ku wa 21 Gicurasi 2015, bagejejwe imbere y’urukiko kuri uyu wa mbere tariki ya 11 Mata 2016, Gen Cyrille Ndayirukiye umwe muri abo akaba avuga ko abavoka be bahiye ubwoba.
Gen Cyrille Ndayirukiye wari wungirije Gen Niyombare Godefroid ubwo bageragezaga guhirika Nkurunziza, ubwo yagezwaga imbere y’urukiko rw’ikirenga rwa Gitega nibwo yatangarije abanyamakuru ko abavoka be bafite ubwoba bw’uko nabo bashobora gushyirwa mu gatebo kamwe n’abo baburanira.
Aba bavoka 3 ngo bafite inkeke z’uko nabo bashyirwa kuri uru rutonde rw’abari bashyigikiye iyi kudeta, abo bakaba ari umubiligi Bernard Maingain, Onesime Kabayabaya na Lambert Nsabimana we wanatumijwe na pariki nkuru y’i Bujumbura.
Ndayirukiye akaba avuga ko ubwo atari ubutabera nyabwo, ahubwo ko harimo ikindi kibazo gikomeye cyane dore ko yatangiye kuburana anasaba ko hazanwa Gen Prime Niyongabo,Gen Pontien Gaciyubwenge,… bateguranye umugambi.
Ubushinjacyaha bwasabiye aba 21 ibihano mu byiciro 4, Cyrille Ndayirukiye, Juvenal Niyungeko batazira Kiroho, Zenon Ndabaneze na Hermenegilde Nimenya basabiwe gufungwa burundu.
Ikindi cyiciro kigizwe n’abandi 9 bo ku rwego rwa colonel, Capitaine na Major basabiwe gupfungwa imyaka 30 no kumara imyaka 10 badakora akazi ka Leta akariko kose.
Icyiciro cya 3 ugizwe n’abasirikare n’abaporisi bato, bari abashoferi n’abashinzwe kurinda aba basirikare bakomeye bo ku rwego rwa General. Abo basabiwe gufungwa imyaka 5.
Icyiciro cya kane, ni ababaye abere aribo General Prime Ngorwanubusa, Colonel Jean Bosco Daradangwe hamwe na Colonel Hagabimana Richard.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Theoneste/Bwiza.com
