Perezida Raul Castro wa Cuba yaburiye abaturage b’igihugu cye kuri uyu wa Gatandatu ababwira ko Leta Zunze Ubumwe za Amerika ziyemeje kurandura impinduramatwara za gisosiyalisiti za Cuba nubwo ngo ibihugu byombi bigeregeza kubyutsa umubano na perezida Obama akaba aheruka kubasura, yongeraho ko ishyaka rimwe rukumbi rya gikomunisiti ari ryo ryarinda izi mpinduramatwara bagezeho.
Perezida Castro yabwiye abari bateraniye muri kongere ya mbere mu myaka 5 ishize y’ishyaka rya gikomunisiti riri ku butegetsi ko ubu bakwiye kuba maso kurusha na mbere.
Mu ijambo ryamaze amasaha abiri yavugiye aho, perezida Raul castro yavuze ko icyifuzo cya perezida Obama cyo kurangiza ibihano Leta Zunze Ubumwe za Amerika zafatiye Cuba cyakiriwe neza ariko ngo ari ubundi buryo Amerika ishaka gukoresha mu kuzana impinduka za politiki muri Cuba kuva leta yari ishyigikiwe na Leta Zunze Ubumwe za Amerika yahirikwa mu 1959 bigizwemo uruhare na ba Castro.
Mu Ukuboza 2014, ba perezida Obama na Castro bari batangaje ko bagiye kurangiza urwikekwe rumaze imyaka myinshi hagati y’ibihugu byabo, bagatangira umubano mushya. Ariko ubwo perezida Obama aheruka muri Cuba, ngo yarakaje abategetsi ba Cuba ubwo yasabaga ko habaho ubwisanzure muri politiki ndetse hakaba na demokarasi mu gihugu kiyobowe n’ishyaka rimwe rukumbi.
Perezida Castro yavuze ku mpinduka bateganya gukora, ariko asobanura ko Cuba itarimo iratera intambwe igana muri Capitalism, avuga ko ibihugu nk’u Bushinwa na Viet Nam ari icyitegererezo kandi bigendera ku matwara ya gikomunisiti.
Yashimye ukuntu abantu bikorera utwabo bagenda biyongera muri Cuba, ariko avuga ko Leta Zunze Ubumwe za Amerika zishaka kubahinduramo imbaraga z’abatavuga rumwe n’ubutegetsi. Obama ngo akaba yaravuze cyane ku bakora business nto ndetse na ba rwiyemezamirimo mu ijambo yavugiye i Havanna nk’uko iyi nkuru dukesha Reuters ikomeza ivuga.
Raul Castro kandi yavuze ko akizera inyungu zava mu gusubiza mu buryo umubano hagati ya Cuba na Leta Zunze Ubumwe za Amerika, ariko ko atizeye isezerano Obama yamuhaye ry’uko nta mananiza y’impinduka mu bya politiki n’ubukungu Amerika izashyira kuri Cuba.
Ishyaka rya gikomunisiti ryashinzwe mu 1965 muri Cuba, rigaragara nk’irikomeye kurusha guverinoma y’igihugu ubwayo. Ryayobowe na Fidel Castro kugeza mu 2011 ubwo murumuna we, Raul Castro yamusimburaga akaba ari we uriyobora.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
