Minisitiri w’Ubuhinzi n’Ubworozi, Mukeshimana Gérardine, yatangaije nshya yo guhugura urubyiruko by’umwihariko urwibumbiye mu Ihuriro ry’Urubyiruko rwize Ubuhinzi n’Ubworozi (RYAF), ku bufatanye na Kaminuza ya Christian University of Rwanda (CHUR) n’ Ikigega gitanga ingwate ku mishinga mito n’iciriritse (BDF).
Ni umuhango wabaye kuri uyu wa Gatanu tariki 30 Kanama 2019, Ku ishami rya BDF riri mu Murenge wa Gatenga, Akarere ka Kicukiro ni ho hatangirijwe iyi gahunda yatangiranye n’abagera 12.
Biteganyijwe ko nibura mu mezi atandatu hazaba hamaze guhugurwa urubyiruko rwo mu turere 30 BDF ikoreramo [ni ukuvuga ko muri buri Karere hazahugurwa abari hagati ya 10 na 20.
Aya mahugurwa azatangwa binyuze mu bufatanye BDF yagiranye na RYAF, Christian University of Rwanda [CHUR] n’abandi bafatanyabikorwa batandukanye.
Minisitiri Mukeshimana yasabye BDF kwibanda ku mishinga y’urubyiruko by’umwihariko urukora mu buhinzi n’ubworozi, asaba ko habaho uburyo bwihariye bwo kwegera uru rubyiruko aho bibaye ngombwa, ikarufasha guhura n’ibigo by’imari.
Yagize ati “Nimwe [BDF] muzi imishinga y’urubyiruko by’umwihariko urugitangira kuko usanga banki zitabazi, niyo mpamvu dusaba ko amafaranga Minagri inyuza muri BDF akoreshwa uko bikwiye agafasha urubyiruko.”
Perezida wa Kaminuza ya Christian University of Rwanda, Prof. Habumuremyi Pierre Damien washinze Christian University of Rwanda yavuze ko ari “Iby’agaciro guhugura urubyiruko rufite imishinga y’ubuhinzi n’ubworozi by’umwihariko abakiri mu mashuri.”
Biteganyijwe ko abatoranyijwe bazahugurwa binyuze mu kigo cyigisha ibijyanye no kwihangira imirimo cyashyizweho na BDF.
Aba bahugurwa ku buryo bwo kunoza imishinga yabo, uko bashaka amasoko, kumenyekanisha imisoro, kwegera ibigo by’imari, kwandikisha ibigo byabo n’ibindi.
Amafoto: Twitter BDF
