Umurambo w’umukobwa w’imyaka 18 y’amavuko wabonwe ku musozi wa Nyavyamo, Zone Ndora, Komini Bukinanyana, mu Ntara ya Cibitoke.
Ni umurambo wabonwe n’abaturage muri aka gace, amakuru ava muri Polisi y’u Burundi akaba avuga ko uyu mukobwa yishwe nyuma yo gusambanywa, babiri bashinjwa bakaba batawe muri yombi.
Mu gitondo cyo ku wa Gatatu tariki ya 1 Nzeri 2019, nibwo abaturage baremaga isoko bazindutse, bawubonye bahita bamenyesha polisi, uyu mukobwa wishwe akaba yaramenyekanye, yari atuye kuri uyu musozi wa Ndora.
Umwe mu bapolisi b’u Burundi (Officier) bashinjwe ubugenzacyaha, waganiriye na Sosmedia/ Burundi ariko utifuje ko amazina ye atangazwa, yagize ati “Uyu mukobwa ukiri muto twasanze ava amaraso, bigaragaza ko yafashwe ku ngufu mbere yo kwicwa”.
Iki kinyamakuru gitangaza ko mu gihe kitarenze ukwezi kumwe, muri Komini Bukinanyana hamaze kuboneka imirambo y’abantu bishwe mu buryo budasobanutse isaga 10.
Abaturage ndetse n’abaharanira uburenganzira bwa muntu muri aka gace bakaba bavuga ko biteye impungenge mu gihe hataramenyekana ababyihishe inyuma. Babiri bashinjwa urupfu rw’uyu mwari bakaba bari mu maboko ya Polisi.
Â
