Polisi ya Congo- Kinshasa yataye muri yombi Umugore witwa Nzigira Aimerance wari ugemuriye inyeshyamba zikomoka mu Rwanda FPP-ABAJYAMUGAMBI amasasu y’ubwoko bw’imbunda ya mashinigani (machine gun) ndetse n’imyambaro ibiri y’abarinda umukuru w’iki gihugu. Amakuru agera kuri Rwandatribune.com dukesha iyi nkuru, umwe mu bayobozi ba Polisi mu gace ka Kiwanja muri Teritwari ya Rutshuru aravuga ko kuri iki cyumweru taliki 03, Ugushyingo 2019 ahagana saa tanu n’igice z’amanywa, ari bwo polisi yafashe uyu mugore usanzwe atuye mu Mujyi wa Goma. Ibikoresho bivugwa ko Nzigira yari ajyaniye Col. Dani /Ifoto: Rwandatribune Uyu mugore ngo yerekezaga ahitwa Gatwiguru muri Teritwari ya Rutshuru aho yari ajyanye ibi bikoresho bya gisirikane ahitwa ku muyobozi wa FPP-Abajyamugambi, Col. Dani. Ubu Nzigire akaba ari mu maboko ya Polisi ategereje gushikirizwa ubushinjacyaha. Inyeshyamba za FPP -ABAJYARUGAMBI ni bantu ki? FPP –ABAJYARUGAMBI ni umutwe w’inyeshyamba z’Abanyarwanda ziyomoye kuri FDLR mu mwaka wa 2003, uza gushingwa n’uwitwa Maj. Soki. Izi nyeshyamba zaje kwiyita Mai Mai Soki nyuma ahagana muri 2013 ubwo Soki yicwaga nibwo yaje kwicwa n’ingabo za Congo (FARDC) asimburwa na Col.Dani ndetse ahindura n’izina. Hari amakuru avuga ko uyu mutwe ufite ibirindiro mu bice bya Katwiguru, Kibirizi, n’ahitwa Busesa, ariko ibi birindiro hakaba hashize ibyumweru bitatu hose bahirukanwe n’umutwe w’ingabo zidasanzwe za FARDC. Bivugwa ko ubu izi nyeshyamba zahungiye ahitwa Kirama hagenzurwa na FDLR. Bivugwa uyu mutwe ufitanye umubano wihariye na RNC ya Kayumba Nyamwasa, amakuru Bwiza.com itapfa kwemeza.
