Special Forces kabuhariwe ku isi mu 2019 -Amafoto

Amagambo ‘Special Force’ ari mu rurimi rw’Icyongereza, twagenerekera mu Kinyarwanda agasobanura ‘umutwe w’ingabo zidasanzwe’.

Ziba ingabo zidasanzwe kuko zihabwa imyitozo idasanzwe ugereranyije n’ihabwa abandi basirikare. Hari ababivuga neza ngo ni imyitozo y’urupfu bitewe n’ibikorwa ndengakamere bakora kugira ngo bazavemo abarwanyi b’ibitangaza. Zitwa Special Forces kabuhariwe bitewe n’ibitero zagabye, zigatahukana icyazijyanye, zikabasha gutabara imbohe mu isenga y’intare cyangwa se ahantu hagoye cyane.

Special Forces zifashisha uburyo buhanitse kandi budasanzwe (Special Tactics) mu kugaba ibitero kuko ahanini usanga ari wo mwihariko wazo ugereranyije n’igisirikare gisanzwe. Ibyo zikora zibifashwa n’ibikoresho bihagije ziba zifite harimo ibyo kumena ibikuta, inzugi nk’ibiturika, ibyuma, imbunda n’imyambaro y’ubwirinzi.

Aha ngaha tuhafite urutonde rwa Special Forces 10 zikomeye ku isi n’incamake y’amateka yazo. Bitewe n’ibanga ry’akazi, hari izidatanga amakuru menshi ku bikorwa byazo, ni yo mpamvu utatungurwa no kubona Navy Seals ku myanya y’inyuma, Delta Force yo muri America, ubukombe muri Special Forces ntibonekemo. Urutonde rurambuye dukesha Ice Pop, rushyira Delta Force ku mwanya wa 21.

Nguru urutonde:

1. SAS (Special Air Service)

Iyi Special Force ni iyo mu Bwongereza. Yabayeho kuva mu Ntambara ya Kabiri y’Isi mu 1941. SAS yamenyekanye cyane ku wa 30 Mata 1980 muri Operasiyo Nimrod, ubwo yagabaga igitero kuri ambasade ya Iran mu Bwongereza muri Kensington y’Amajyepfo mu murwa wa Londre. Iki gihe abiyahuzi batandatu bari bafashe abantu 26 bari biganjemo abayobozi. SAS yarinjiye ibatabara bose, amashusho aca kuri televiziyo. SAS yagabye ikindi gitero cyiswe Operasiyo Barras muri Sierra Leone mu 2000. Mu 2012 yagabye ikindi muri Afghanistan, ibihora imbohe 4. Byatunguye benshi ubwo umwe mu barwanyi ba SAS yinjiye muri hoteli yari yagabwemo igitero na Al Shabab muri Kenya kugira ngo ayirwanye wenyine. Iki gitero cyagabwe muri Mutarama 2019, abantu 21 bagwamo.

2. Army Ranger Wing (ARW)

Iyi ni Special Force yo muri Ireland yashinzwe mu 1980 kugira ngo ihangane n’imitwe y’iterabwoba. Abarwanyi bayo batoranywa mu gisirikare cy’igihugu cyo ku butaka, mu mazi no mu kirere. ARW yitabajwe mu butumwa bw’amahoro muri Somalia, Tchad, Liberia n’ahandi hatandukanye.

3. COS

Mu magambo arambuye, COS bisobanuye ‘Commandement des Operations Speciales’, mu Cyongereza ni Special Operations Command. COS ni Special Force yo mu Bufaransa yavutse mu 1992 nyuma y’itambara yo mu kigobe cya Perise. Uyu mutwe ngo washinzwe kugira ngo uzafashe Ubufaransa kwirwanaho kuko bwikangaha ko hashobora kurota indi ntambara muri iyi myaka. COS igizwe n’ingabo zirwanira ku butaka, izo mu mazi n’izirwanira mu kirere. Yamenyekaniye cyane mu guhashya imitwe y’iterabwoba yibasiye umugabane w’Uburayi.

4. JTF2

Mu magambo arambuye ni Joint Task Force 2. Ni Special Force yo muri Canada igizwe n’intoranywa z’abasirikare b’igihugu. JTF2 ibaho yiteguye gutabara aho rukomeye muri Canada cyane cyane guhangana n’ibitero by’iterabwoba. Ibikorwa by’uyu mutwe na byo bigirwa ubwiru.

5. Commandos Marine/ Green Berets

Iyi ni Special Force y’Ubufaransa irwanira mu mazi. Kimwe SAS yo mu Bwongereza, Commandos Marine na yo yavutse mu 1941 mu Ntambara ya Kabiri y’Isi. Uyu mutwe wahawe izina rya Green Berets/Berets Vers bitewe n’ingofero z’icyatsi wambara. Ufite abarwanyi bagera muri 650.

6. Shayetet 13

Shayetet 13 ni Special Force irwanira mu mazi yo muri Israel. Ni umutwe uvugwaho gukomera ariko ngo ntabwo ushyira hanze ibikorwa byawo. Abarwanyi ba Shayetet 13 ngo bamara nibura imyaka ine bari mu myitozo, aho bibanda cyane ku buryo imibiri yabo yahinduka intwaro zikomeye.

7. Spetsnaz

Spetsnaz ni izina rihabwa Special Forces zose zo mu Burusiya. Ice Pop itubwira ko ibikorwa byitirirwa iyu mitwe muri filime nka Hitman, Call of Duty na Predator ari byo ikora no mu buzima bwawo busanzwe. Uyu mutwe ugengwa n’Urwego rw’Ubutasi rw’Uburusiya, GRU (Glavnoje Razvedyvatel’noje Upravlenije), mu Cyongereza ni Main Intelligence Directorate. Iyi mitwe ikorera mu cyahoze ari Ubumwe bw’Abasoviyete hose.

8. Navy Seals

Iyi ni Special Force yo muri Leta Zunze Ubumwe z’America ifite imitwe itatu: irwanira mu mazi (Sea), mu kirere (Air) no ku butaka(Land), hakaba ari na ho impine ya SE-A-L yaturutse . Ni imwe mu mitwe idasanzwe ifite ibikoresho bihambaye kandi ugoye kuwinjiramo. Ni wo mutwe wagabye igitero cyaguyemo ikihebe Osama bin Laden ku wa 2 Gicurasi 2011. Navy Seal ivugwaho kugaba ibindi bitero bikomeye, ahantu hakomeye ariko ibyinshi ntibyigeze bitangazwa. Navy Seals washinzwe ku wa 1 Mutarama 1962 na John Kennedy wabaye Perezida w’iki gihugu.

9. GIGN

GIGN (Groupe d’Intervention de Gendermerie National) ni Special Force y’Abafaransa igizwe n’abapolisi gusa. Uyu mutwe washinzwe mu 1974 kugira ngo uhangane n’imitwe y’iterabwoba, kubohora imbohe no guhangana n’ibyahungabanya umutekano w’igihugu. Ni umutwe ufite ubuhanga n’ubunararibonye kuko kuva wanshingwa, umaze kujya mu butumwa busaga 1800 kandi wabohoye imbohe zirenga 600 ariko ibikorwa byawo ngo ntibyemerewe gufotorwa ngo bijye hanze. GIGN yamenyekanye cyane ubwo yabohozaga indege ya sosiyete ya Air France, Flight 8969 yari yashimuswe na bane b’umutwe w’iterabwoba wegamiye kuri Isilamu wo muri Algeria, GIA (Islamic Group of Algeria) tariki ya 24 Ukuboza mu 1994.

10. KSK

Ni Special Force yo mu Budage yashinzwe mu 1996. KSK bisobanuye ‘Kommando Spezialkräfte’ mu rurimi rw’Ikidage, mu Cyongereza ni ‘Special Force Command’. Uyu mutwe washinzwe kugira ngo uhangane n’imitwe y’iterabwoba umaze wagiye uhabwa ibihembo byinshi n’umuryango wa NATO ku by’ubutumwa wagize muri Kosovo, Bosnia na Herzegovina no muri Afghanistan harimo n’igitero wagabye mu nzu y’ubwihisho bwa Al Qaeda, i Kabul mu 2006.

Indi mitwe ikurikiye iyi ni Special Forces Snipers ya ba mudahusha yo muri Amerika, Gendarmerie yo muri Serbia, Special Operation Forces yo muri Iraq, Hunter Corps yo muri Denmark, Kampfschwimmer yo mu Budage, MARCOS yo mu Buhinde, Armed Forces ihuriweho na Taiwan n’Ubushinwa, Jagdkommando yo muri Austria, Armed Forces yo muri Peru, Special Service Group muri Pakistan na Delta Force muri America.