Umufasha wa Perezida wa Repubulika, Madamu Jeannette yagaragaje ko hakwiye gukurwaho inzitizi zose zibuza uburinganire n’ubwuzuzanye kugerwaho.
Ibi madamu Jeannette yabigejeje ku bitabiriye inama mpuzamahanga isuzuma ibyagezweho mu myaka 25 bijyanye n’iterambere ry’abaturage (ICPD25) ikaba yibanda ku myororokere, uburinganire n’ibyateza imbere umugore by’umwihariko iri kubera i Nairobi muri Kenya.
Imyanzuro y’iyi nama yari iyobowe ahanini n’abagore batanze abandi kugera mu bushorishori mu buyobozi ku Isi, yafatiwe i Cairo mu Misiri mu mwaka wa 1994.
Madame Jeannette Kagame na we uri mu bitabiriye iyi nama, yatanze ibisubizo byafasha abagore n’abakobwa kuva mu bwigunge bakagera mu myanya iyobora Isi nka basaza babo.
Ni inama yitabiriwe n’abasaga ibihumbi bitandatu, abagezaho ijambo Jeannette Kagame yagize ati “Mureke dukureho inzitizi zibuza kugera ku buringanire n’ubwuzuzanye nyabwo, tureba iby’ingenzi bishoboka byafasha umugore kwigeza ku bigezweho.”
Yasobanuye ko icyakorwa ari uguca ubukene, ubujiji no kutigirira icyizere byibasiye igice kinini cy’abagore n’abakobwa ku isi, ndetse no kwifashisha abagabo bumva akamaro ko gufatanya n’abagore mu iterambere.
Akomeza agira ati “Niba tugomba kugera ku kuboneza urubyaro neza, niba tugomba kurandura burundu impfu mu gihe cyo kubyara, ndetse no guca burundu ibikorwa by’ihohoterwa rikorerwa abagore n’abakobwa birimo gukurwaho imyanya ndangagitsina.”
Madame Jeannette Kagame akomeza asaba ibihugu bihagarariwe muri iyo nama, kuyivanamo ibitekerezo byafasha kubaka ubuyobozi, inzego n’ubushobozi bikomeye mu gushyira umugore mu mirimo no mu myanya ifata ibyemezo.
Mu mibare yatangajwe na Perezida wa Kenya, Uhuru Kenyatta afungura iyo nama y’iminsi itatu kuva 12-14/11/2019, yavuze ko umugore umwe muri batanu ku isi agihura n’ihohoterwa rishingiye ku gitsina, ko abagore n’abakobwa 800 bapfa buri munsi babyara.
Avuga kandi ko abana b’abakobwa bangana na miliyoni enye ku Isi bacibwa imwe mu myanya ndangabitsina yabo buri mwaka.
Iyi nama kandi yagaragarijwemo imibare y’ abana b’abakobwa barenga ibihumbi 33 bahatirwa gushyingirwa buri munsi, n’abagore miliyoni 232 ku Isi yose bifuza kuboneza urubyaro ariko bakaba badakoresha uburyo bugezweho.
