Mu ijoro ryakeye ryo kuri uyu wa 20 Ugushyingo 2019, abarwanyi b’umutwe w’inyeshyamba wa ADF bishe abaturage 19, batwika urusengero na farumasi muri teritwari ya Beni muri Repubulika Iharanira Demukarasi ya Congo.
Inkuru y’ibiro Ntaramakuru by’Ubwongereza (Reuters) ivuga ko ADF yashimuse n’umubare munini w’abaturage mu bitero bibiri yagabye mu duce dutandukanye tugize teritwari ya Beni.
Umuvugizi w’Igisirikare cya Congo/Kinshasa, Maj. Mak Hakuzay yatangarije Reuters ko hishwe abaturage 7, abasirikare b’igihugu 2 barakomereka, hakaba hari abandi baturage benshi bashimuswe.
Nyuma yaho, Donat Kibwana uyoboye teritwari ya Beni yavuze ko hari abandi baturage 12 bapfiriye muri ibi bitero.
ADF iri kwihimura ku bitero ingabo z’iki gihugu zimaze hafi amezi abiri zigaba ku mitwe y’inyeshyamba.
Hashize icyumweru kirenga ingabo za Congo zitangaje ko zimaze kwica abarwanyi barenga 25 ba ADF. Tariki ya 19 Ugushyingo, Maj. Hakuzay yavuze ko FARDC yishe abayobozi bakuru ba ADF harimo uwitwa Mzee wa Kazi na Sarah. Biciwe mu gitero cyagabwe mu gace ka Mopobu muri Beni.
