Nyuma y’iyicwa rya Gen Mudacumura Sylvestre na bagenzi be bari abayobozi muri FDLR, bamwe mu barwanyi bayo barimo gushyira intwaro hasi bakishyikiriza inzego za Leta.
Aba barwanyi ba FDLR hamwe n’abandi bo mu mitwe ya Kalehe, Kirikicho, Ngubito na Karume ngo bashyize intwaro hasi mu mpera z’icyumweru gishize bishyira mu maboko y’igisirikare cya FARDC hamwe n’intwaro zabo.
Nk’uko bitangazwa na Depite Koko Cirimwami Akeem, ngo aba barwanyi bashyize intwaro hasi ni 35, hamwe n’intwaro zabo 7 za gisirikare n’izindi zitandukanye za gakondo.
Ikinyamakuru Actualitecd gitangaza ko abadepite basaba inyeshyamba zose zirwanira kuri ubu butaka gushyira intwaro hasi mu mahoro kugira ngo amahoro n’umutekano birusheho gusagamba mu Karere.
Yagize ati “icyavuye mu bukangurambaga bwakozwe, twakiriye abarwanyi 35, imbunda 7 gerenade ebyiri n’izindi ntwaro za gakondo nyinshi”.
Uyu mudepite avuga ko mu myaka ibiri ishize mu gace ka Kalehe hamaze kwicwa abayobozi b’inyeshyamba za Ngubiinda Binongari, Simba, Bahati Kana, Rubunda, Dogo Rukana wa Raïa Mutomboki Kirikicho,…
Bamwe mu barwanyi ba FDLR bakomeje gushyira intwaro hasi nyuma y’iyicwa ry’umuyobozi wazo, Lt.Gen.Mudacumura Sylvestre wishwe ku wa 18 Nzeri 2019, hamwe n’abandi bayobozi batandukanye bari bafatiye runini izi nyeshyamba zirwanya Leta y’u Rwanda, bafatwa mpiri abandi bakicwa
