Diamant nini kurusha izindi yavumbuwe nyuma y’ikinyejana izashyirwa mu cyamunara, ku madolari miliyoni 70, kuwa 29 Kamena i Londres nk’uko byatangajwe n’inzu ikora ibijyanye no guteza cyamunara yitwa Sotheby yo mu Bwongereza.
Iyi diamant iruta izindi yacukuwe muri Botswana na sosiyete ikora ubucukuzi bw’amabuye y’agaciro yo muri Canada yitwa Lucara, ibararirwa uburemere bwa Carats 1,111.
Mbere yo gushyirwa mu cyamunara iyi diamante izabanza kwerekanwa I New York kuri iki Cyumweru, mbere yo gusubizwa mu Burayi rinyuze Anvers mbere yo gusubizwa muri Sotheby ikazamurikwa i Londres mu Bwongereza kuva kuwa 18 kugeza kuwa 28 Kamena.
Iri buye ry’agaciro ryahawe izina rya Lesedi La Rona nyuma yo kugurwa rishobora kuzagabanywamo ibice bigakoreshwa mu gutunganya imitako cyangwa rikagumishwa uko rimeze.
Umunsi iryo buye ryacukuweho nk’uko iyi nkuru dukesha Jeune Afrique ikomeza ivuga, hanacukuwe irindi ripima carats 830 na none muri Botswana. Iki gihugu kikaba ari icya kabiri ku isi mu kugira diamants nyinshi mu butaka bwacyo nyuma y’u Burusiya. Iyi diamante rero ngo ikaba ishobora kuba ari iya gatatu nini ibonetse ku isi nk’uko byemezwa na sosiyete yaricukuye yitwa Lucara.
Diamant nini ku Isi iracyari iyacukuwe muri Afurika y’Epfo
Diamant nini ku Isi iracyari iyiswe Cullinan ipima carats 3,106 yacukuwe muri Afurika y’Epfo mu 1905.
Iyi yaje kuvanwamo uduce twinshi dukoreshwa ibintu bitandukanye harimo n’ibyagiye ku nkoni no ku ikamba ry’Umwamikazi w’u Bwongereza.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns/Bwiza.com
