Uganda: ISIS na Al Shabab birategura ibitero bikoresheje imiti ihumanya abantu

Polisi ya Uganda n’izindi nzego z’umutekano barahiga bukware ibyihebe bibiri byo mu mitwe ya Islamic State ndetse na Al Shabab biherutse kwinjira muri Uganda nk’uko byatangajwe n’umukuru w’igipolisi, Gen. Kale Kayihura.

Ubwo yagiranaga ikiganiro n’itangazamakuru kuri uyu wa Mbere nimugoroba ku cyicaro gikuru cya polisi ahitwa Naguru, Gen. Kayihura yavuze ko nyuma yo gufatira abanyeshurikazi 2 bari kumwe nabo kuri Kaminuza Mpuzamahanga ya Kampala muri Kenya, abandi bahise bambuka bakajya muri Uganda.

Yagize ati: “Nyuma y’itabwa muri yombi rya Mohammed Abdi Ali muri Kenya, bagenzi be, Ahmed Hisha na Farah Degan bahise bahava none birakekwa ko binjiye muri Uganda banyuze ku mupaka wo mu burasirazuba. Twizeye ko bakihishe muri Uganda”.

Nk’uko byatangajwe n’umuyobozi wa polisi ushinzwe kurwanya iterabwoba, John Ndungutse, ngo bavumbuye umugambi w’igitero cyari gikomeye cyari kugabwa ku gihugu n’agatsiko ka ISIS na Al Shabab nk’uko Chimpreports dukesha iyi nkuru ikomeza ivuga.

Yavuze ko igitero cyo muri Uganda cyari kuzabera rimwe n’ikindi muri Kenya hakaba hari gukoreshwa iyitwa virus ya anthrax (ubusanzwe ifata amatungo ariko abantu begereye ayo matungo nabo barayandura). Yongeyeho ko babashije gufata abayobozi b’ibyihebe b’Abanyakenya bavanze n’Abasomali babasubiza muri Kenya.

Ndungutse yakomeje avuga ko aka gatsiko k’iterabwoba gashaka kugaba ibitero muri Uganda na Kenya kagizwe ahanini n’abanyeshuri mu buvuzi muri Kampala International University, bakaba barashinze itsinda kuri whatsapp bifashisha mu kwinjiza abandi mu bikorwa by’iterabwoba. Aba rero bakaba bashaka gukora iterabwoba bakoresheje uburyo budasanzwe bwo guhumanya abantu bakoresheje virus ya Anthrax.

Kanda hano ujye ubona amakuru yihuse kandi kugihe kuri Facebook no kuri twitter

Dennis Ns./Bwiza.com