Umuhanzi nyarwanda Bruce Melodie yatoranyijwe mu cyiciro cy’umuhanzi mwiza w’umwaka mu Karere k’Afurika y’i Burasirazuba mu bihembo bya Headies 2025, bizatangirwa muri Nigeria ku itariki ya 5 Mata.
Bruce Melodie arahatana n’abahanzi bakomeye mu karere barimo Diamond Platnumz na Juma Jux bo muri Tanzania, Bien Aime Sol wo muri Kenya, ndetse n’umuhanzikazi wo muri Uganda Azawi. By’umwihariko, Bien Aime Sol ni we baririmbanye mu ndirimbo ye ‘Iyo Foto’ yakunzwe cyane.
Iri rushanwa rigiye kuba mu gihe Bruce Melodie akomeje kwamamaza album ye nshya ‘Colorful Generation’, imaze gukundwa cyane muri Nigeria no mu bindi bihugu bya Afurika. Aheruka muri Nigeria mu bikorwa byo kuyamamaza ndetse amaze no kuyigeza muri Kenya. Biteganyijwe ko azakomereza muri Afurika y’Epfo mu minsi iri imbere.
Ibi bihembo bya Headies byatangiye gutangwa kuva mu mwaka wa 2006, bikaba ari bimwe mu bikomeye muri muzika ya Afurika. Niba Bruce Melodie atsinze, azaba yongeye gushyira muzika nyarwanda ku ruhando mpuzamahanga.
