Visi Minisitiri w’Intebe wa Repubulika ya Demokarasi ya Congo akaba na Minisitiri w’ubwikorezi, Jean-Pierre Bemba umaze iminsi yibasira Joseph Kabila wahoze ari perezida, kuri iyi nshuro yatangaje ko atari n’Umunyekongo ahubwo ababyeyi be ari Abanyarwanda.
Ibi, Jean-Pierre Bemba yabitangarije mu nama yabereye i Kintambo, kuri uyu wa Gatandatu ushize, aho akomereje uruzinduko amazemo iminsi hirya no hino mu gihugu.
Mu mpera z’ukwezi gushize ubwo yari mu Ntara ya Bandundu, Jean-Pierre Bemba yatangaje ko Joseph Kabila atari inyuma y’umutwe wa M23 na AFC gusa, ahubwo ari nawe washinzwe umutwe w’abagizi ba nabi umaze igihe warazengereje intara zavuye mu cyahoze ari Intara ya Grand-Bandundu, ari zo : Maï-Ndombe, Kwilu et na Kwango, ndetse n’amajyaruguru y’uburasirazuba bwa Kinshasa.
Kuri uyu wa Gatandatu i Kintambo Bemba yagize ati: ” Joseph Kabila ntabwo ari umuhungu wa M’zee LD Kabila, na nyina n’Umunyarwandakazi, ise akaba yarasize ubuzima mu ntambara yo kurwanya Mobutu. Izina Kabila Kabange yarihawe na Ngoy Mukena waje kwicwa,”
Bemba wanagarutse ku mpamvu zamuteye gushinga umutwe w’inyeshyamba wa MLC, yanatangaje ku mugaragaro ko atigeze yemera impinduramatwara ya AFDL yashinzwe na Laurent Desire Kabila yakuyeho umunyagitugu Mobutu Sese Seko binavugwa ko yari anafitanye umubano wa hafi na se wa Bemba ari we Bemba Saolona.
Jeannot Bemba Saolona wavutse kuwa 3 Nzeri 1942 agapfa ku itariki ya 1 Nyakanga 2009, yari umucuruzi ukomeye w’Umunyekongo, wabaye Minisitiri w’ubukungu n’inganda, akaba na Senateri wa Equateur. Yafatwaga nk’umucuruzi uzwi cyane mu gihe cya Zaire kandi yari inshuti magara ya Mobutu Sese Seko.
Ise wa Jeannot Bemba Saolona yari Umubiligi naho nyina akaba Umunyekongokazi. Ntabwo yize bihambaye ahubwo yinjiye mu mwuga w’ubucuruzi. Bemba uyu yaje kuba, abifashijwemo na Mobutu Sese Seko, umwe mu bantu bakize muri Zaire kandi agenzura ihuriro rinini, SCIBE, ry’ishoramari mu bucukuzi bw’amabuye y’agaciro no kohereza ibicuruzwa hanze. Umukobwa wa Bemba, Catherine Bemba, mushiki wa Jean-Pierre Bemba, yashakanye n’umwe mu bahungu ba Mobutu, Nzanga Mobutu.
