Abarwanyi 30 ba FLN barimo na Col. Marc Nizeyimana, uzwi nka Marc Masamba wari ufite umwanya ukomeye muri izo nyeshyamba zishamikiye ku mpuzamashyaka MRCD batawe muri yombi n’Ingabo za Repubulika Iharanira Demokarasi ya Congo (FARDC) mu bikorwa byo guhashya imitwe y’iterabwoba mu Burasirazuba bw’icyo gihugu. Umutwe wa FLN (Force de Libération Nationale) washinzwe na MRCD Ubumwe (Mouvement Rwandais Pour Le Changement Démocratique), igizwe n’amashyaka CNRD Ubwiyunge ya Gen Wilson Irategeka [bikekwa ko yishwe], PDR Ihumure ya Paul Rusesabagina, RRM (Rwandese Revolutionary Movement) yashinzwe na Nsabimana Callixte ‘Sankara’ na RDI -Rwanda Rwiza ya Faustin Twagiramungu. Col. Masamba n’inyeshyamba bari kumwe baguye mu gico bari batezwe na FARDC bava mu gace ka Hewa Bora bagana mu Burundi banyuze mu Ishyamba rya Rukoko. Imirwano yafatiwemo Col. Masamba Marc na bagenzi be yebereye muri Teritwari ya Fizi muri RDC ku wa 1 Werurwe 2020. Imirwano yamaze amasaha abiri, yaguyemo abarwanyi ba FLN 15. Col. Marc Masamba ni muntu ki? Col. Masamba Marc yavukiye mu Ntara y’Uburengerazuba ahitwa i Rubengera (Kibuye). Yakuriye mu kigo cya gisirikare cy’i Kigali ahitwa Camp Kigali. Yize amashuri abanza muri Camp Kigali nyuma akomereza ayisumbuye mu Karere ka Nyamasheke muri Cyangugu. Amasomo yayakomereje muri Kaminuza y’u Rwanda mu Ruhengeri aho yize Siyansi n’Uburezi. Aha yabanaga na Se wari Caporal mu Ngabo z’Igihugu zo ku butegetsi bwa Juvenal Habyarimana (FAR). Yinjiye muri ALIR [yaje guhinduka FDLR] ahagana mu 1997. Hari amakuru avuga ko mu myaka isaga 10, Masamba yari S3 muri FDLR; ushinzwe imirwano muri Batayo ya Zodiac. Bivugwa ko yashakanye n’umugore w’Umukongomani ariko ntihazwi umubare w’abana babyaranye aho yabaga mu Nkambi ya Kashusha mu Ntara y’Amajyepfo kuva muri Nyakanga 1997. Uyu kandi mu mpera z’umwaka wa 1996, yinjiye mu gisirikare ahitwa Tingi Tingi aho yari muri poromosiyo ya 36 y’Ishuri rya Gisirikare (ESM), aho yavuye yerekeza muri Congo-Brazaville. Col. Nzeyimana yagarutse muri Repubulika Iharanira Demukarasi ya Congo mu 1998. Uyu yaje gusubira muri ESM ahitwa Mpelembe mu gace ka Pweto mu Ntara ya Haut Katanga mu 1999. Mu Gushyingo 2002 yasoje amasomo mu bya Siyansi n’Uburezi muri Kaminuza ya Lubumbashi nyuma y’imyaka ibiri. Yahawe imirimo itandukanye, mu 2016 ubwo hashingwaga CNRD Ubwiyunge, Col. Masamba Marc yahawe inshingano zo kuba ushinzwe Ibikoresho muri FLN, mu 2018 kugeza ubwo yafatwaga yari Umuyobozi wungirije w’Agace k’imirwano ka Kivu y’Amajyepfo yungirije Gen. Hakizimana Antoine Jeva.
2 Responses
Col. Masamba wafashwe na FARDC ni muntu ki?
Masamba rwose! Ngaho nasubire arwane tumurebe se. Ari gukina na equipe atazi mwihorere ubwo se isafari ye ya Colonel ntirangiye ameze nk’igicucu !
Col. Masamba wafashwe na FARDC ni muntu ki?
Masamba rwose! Ngaho nasubire arwane tumurebe se. Ari gukina na equipe atazi mwihorere ubwo se isafari ye ya Colonel ntirangiye ameze nk’igicucu !