Ikipe y’umupira w’amaguru yo mu gihugu cya Espagne, Real Madrid yatangaje kuri uyu wa 12 Werurwe 2020, abakinnyi bayo bose bashyizwe mu kato nyuma y’aho umwe mu bakinnyi b’iyi kipe bakina Basket Ball agaragayeho Coronavirus.
Iby’ihagarikwa ry’ibikorwa byose bya Real Madrid bitewe n’iki cyorezo byatangajwe ubwo aba bakinnyi bari bageze ku kibuga cy’imyitozo kuri uyu wa 12, bamenya ko mugenzi wabo ukina undi mukino yanduye. Ubuyobozi bw’iyi kipe bwahise buyihagarika, kubera ko amakipe akina imikino itandukanye ya Real Madrid asangiye ahantu akorera ibikorwa bitandukanye.
Icyemezo cyo guhagarika ibi bikorwa no gushyira abakinnyi ba Real Madrid mu kato kiziye ku munsi umwe n’icya Shampiyona ya Espagne (La Liga), nayo yabaye isubitswe mu gihe kingana n’iminsi 14, gishobora kwiyongera.
Ingaruka za Coronavirus muri shamiyona zitandukanye
Ubutaliyani ni cyo gihugu cyabanje gufata ingamba zo gusubika imikino itandukanye muri Shampiyona y’icyiciro cya mbere, rimwe itanga uburenganzira bw’uko yaba ariko nta bafana bari ku bibuga. Iki gihugu nacyo cyamaze gusubika shampiyona.
Ibihugu nk’Ubufaransa na byo byagendeye ku ngamba nk’izi, aho umukino wa Olympique Lyonnais na Paris Saint Germain na wo wakinwe nta bafana bari mu kibuga. Ni nako byagenze kandi ubwo iyi kipe yakiraga Borussia Dortmund mu mukino wa UEFA Champions League.
Amakipe nka FC Barcelona, na yo yari yamaze gutangaza tariki ya 10 Werurwe ko umukino wayo wari kuyihuza na Leganes kuri uyu wa 14, uba nta bafana bari kuri sitade. Iki cyemezo cyakurikiranye n’icyo Shampiyona, La Liga yari yafashe, gisaba amakipe yose ari mu cyiciro cya mbere gukina nta bafana.
Izi ngaruka zageze no muri Basketball ku Isi, aho Ishyirahamwe ry’Umukino wa Basketball ku Isi (FIBA) ryarohoye itangazo kuri uyu wa 12, rihagarika amarushanwa atandukanye y’uyu mukino, akorwa kinyamwuga. Shampiyona yo muri Amerika, NBA kuri uyu wa 11 yabanje gusubika imikino yayo nyuma y’aho umukinnyi ukinira Utah Jazz yagaragayeho iki cyorezo.
