Igihangage mu mukino wa Basketball, Kevin Durant na bagenzi be batatu bakinana mu Ikipe ya Brooklyn Nets, basanzwemo Icyorezo cya Coronavirus nk’uko byemejwe n’ikinyamakuru ESPN.
Nyir’ubwite Durant na we yahamirije The Athletic ayo makuru agira ati” Buri wese nabe maso, yiyiteho kandi yishyire mu kato.” Yongeraho ko yumva ameze neza kandi ko nta bimenyetso agaragaza.
Brooklyn akinira ntabwo yahishuye abandi bakinnyi ba bayo banduye, gusa umwe muri bo ni we wari wagaragaje ibimenyetso bya Coronavirus, ku wa kabiri tariki ya 17 Werurwe.
Ubuyobozi bwa Nets bwavuze ko bose uko ari bane bari mu kato aho bari gukurikiranirwa n’abaganga.
Biteganyijwe ko ikipe ya Los Angeles Lakers isuzumisha abakinnyi bayo kuri uyu wa 18 Werurwe, kugira ngo imenye uko bahagaze. Iyi kipe yaherukaga guhura na Brooklyn Bets muri NBA, mbere y’uko iyi shampiyona isubikwa.
Abandi bakinnyi bakina muri NBA bagaragayeho Coronavirus, barimo Rudy Gobert na Donovan Mitchell ba Uttah Jazz, cyo kimwe na Christian Wood wa Pistons.
Durant, ufite imyaka 31, yemeranyije na Nets amasezerano yimyaka ine afite agaciro ka miliyoni 164 zamadorali, nyuma yo kumara imyaka bitatu yari yabanje ari kumwe na Golden State Warriors batwaranye ibikombe bibiri bya NBA, akanaba Umukinnyi mwiza w’iyo shampiyona incuro ebyiri.
