Polisi ya Uganda kuri uyu wa Gatandatu yafatiye itsinda ry’Abashinwa umunani mu karere ka Zombo ubwo bageragezaga kwambuka muri Kongo nyuma yo gutoroka aho bari bashyizwe mu kato ka Coronavirus. Aba bashinwa bari bazanywe mu macumbi ya Naguru n’imodoka y’imwe mu mahoteli akomeye muri Kampala biteganywa ko bazacikira mu yindi iri Entebbe. Umuyobozi muri gipolisi, Asan Kasingye yabwiye Chimpreports ko aba bashinwa bafashwekuwa Gatanu bari baraye mu nyubako y’amacumbi yitwa “Naguru Apartments” abahacumbitse bababona bagahuruza Minisiteri y’Ubuzima maze ikohereza abajya kubapima Covid-19 baherekejwe na Polisi. Polisi ivuga ko aba bashinwa bagomba kugezwa imbere y’inkiko kuko bidasobanutse uburyo baje kuva aho bari bapimiwe bakiyemeza gutorokera muri Congo-Kinshasa cyane ko Minisiteri itari yanasohora ibisubizo by’ibizamini. Ku bijyanye n’impungenge z’uko bafunzwe bashobora kwanduza abandi Kasingye yavuze ko umwanzuro wa nyuma kuri ibi uzafatwa n’urukiko. Kuri ubu igihugu cya Uganda nta murwayi n’umwe wa Coronavirus cyari cyatangaza mu gihe umuturanyi wacyo u Rwanda habarurwa abamaze 17 bamaze kwandura iyi ndwara.
