Abantu babiri muri Uganda bari bari kuri moto barashwe na polisi nyuma yo kurenga ku mabwiriza yatanzwe n’Umukuru w’igihugu, Yoweli Museveni avuga ko gutwara abantu kuri za moto bihagaritswe mu rwego rwo kwirinda gukwirakwiza indwara ya Coronavirus. Abarashwe ni Alex Olyem na Kasim Ssebude bajyanwe mu bitaro bya Mukono nyuma yo kuraswa na polisi batwaye ubwo bagendaga kuri moto ahitwa Gomba. Daily Monitor itangaza ko Olyem yarashwe isasu ku kaguru naho Ssebude we akaba yarashwe mu nda. Polisi y’igihugu cya Uganda yabarashe ibashinja kwica nkana amabwiriza y’umukuru w’igihugu ahagarika ingendo z’ibinyabiziga bya moto mu gihe bo bavuga ko batari bazi ko ryatanzwe kuko badaheruka gukurikira amakuru kuva Perezida Museveni yatangaza ingamba zo gukumira icyorezo cya Covid-19 kimaze kwandura abantu 14 muri Uganda. Aba bombi bavuga ko ubwo abapolisi babahagarikaga ikababaza impamvu bari kuri moto ari babiri nabo bakababaza ikosa ryaba ribirimo niko guhita batangira kurasa amasasu mu kirere ubundi nabo bakabarasa. Umuvugizi wa Polisi mu Mujyi wa Kampala, Patrick Onyango we yatangaje ko aba bagabo babiri bagerageje gusagarira aba bapolisi bari babahagaritse hanyuma bakabarasa mu rwego rwo kwirwanaho. Aba bagabo ni aba mbere bimenyekanye ko barashwe baryozwa gusagarira polisi ibasabye kubahiriza amabwiriza yo kwirinda Coronavirus.
