Burundi: Ibitaro bimaze ibyumweru bitatu byakira abakekwaho cyane Coronavirus

Umuyobozi w’ibitaro byigenga bya Kira (Kira Hospital) mu Burundi, Dr. Christophe Sahayo kuri uyu wa 27 Werurwe 2020 byatangaje ko mu byumweru bitatu byakiriye abarwayi bakekwaho cyane indwara y’icyorezo ya Coronavirus.

Ibi biri mu butumwa bukubiye mu ibaruwa Dr. Sahayo yandikiye Minisiteri y’Ubuzima no kurwanya SIDA ayisaba gushakira umuti iki kibazo, bitewe n’impungenge n’uko nta burenganzira bifite bwo gupima abarwayi b’iki cyorezo.

Dr. Sahayo muri iyi baruwa yagize ati: “Nyakubahwa Minisitiri, mu byumweru bigera kuri bitatu twakiriye abantu bakekwaho cyane COVID_19.”

Uyu muganga mukuru yakomeje avuga ko kuri uyu wa 26 Werurwe 2020 ibitaro bya Kira byakiriye abandi barwayi batatu nabo bakekwaho iki cyorezo.

Iyi Minisiteri mu butumwa yacishije ku rubuga rwa Twitter, yasubize ko: “Laboratwari Nkuru y’Igihugu (INSP) ni yo yemerewe gupima ibizamini bya COVID_19.”

Iramenyesha kandi ko muri aba bantu batatu bageze ku bitaro bya Kira, umwe yafashwe ibizamini, abandi babiri bakaba barasubiye mu rugo nyuma yo gusuzumwa, bagasanga nta kibazo bafite.

U Burundi ni kimwe mu bihugu bibiri bigize Akarere k’Afurika y’Iburasirazuba kitarabonekamo umurwayi wa Coronavirus. Cyagiye kivugwaho amakuru menshi y’ibihuha ko habonetseyo abarwayi, rimwe abantu batabifitiye gihamya bakavuga ko kibahisha kandi kibafite ndetse ko nta bikoresho byo kubapima gifite.

Aya makuru yose yanyomojwe n’iyi Minisiteri ifite mu nshingano ubuzima bw’abaturage, ku bijyanye n’ibikoresho byo gupima abarwayi bakekwaho Coronavirus, kuri uyu wa 27 Werurwe yatangaje ko Laboratwari ya INSP ifite ibikoresho byo gupima ibizamini by’abakekwaho Coronavirus ndetse n’abantu babifitiye ubushobozi.