Mu Buhinde mbere y’uko saa 21:00 z’ijoro zigera, ejo tariki ya 5 Mata 2020, abaturage bazimije amatara maze bahagarara imbere y’ingo zabo, bacanye za buji, amatoroshi, telefoni n’amatadowa nk’uko bari babisabwe na Minisitiri w’Intebe w’iki gihugu Narendra Modi.
Uretse abaturage ba rubanda rugufi, iki gikorwa cyanitabiriwe n’abayobozi bakomeye ndetse n’ibindi byamamare byo mu Buhinde birimo n’abakinnyi ba filimi. Muri New Dheli, amamiliyoni y’Abahinde yazimije amatarara, bamwe bacana telefoni zabo, buji n’amatadowa mu rwego rwo gusubiza ubusabe bwa Minisitiri Modi ngo hagaragazwe uguhuza imitima n’imbaraga mu kurandura coronavirus. Perezida Ram Nath Kovind n’umufasha we Savita, Visi Perezida M Venkaiah Naidu n’umufasha we Ushamma, abaminisitiri batandukanye nka Smith Shah na Rajnath Singh ndetse n’abandi banyacyubahiro baturutse mu nzego zitandukanye barimo n’abakinnyi ba Bollywood, bose bari bacanye buji ndetse na Minisitiri Modi wazanye iki gitekerezo na we ubwe yashyize amafoto ku rukuta rwe rwa Twitter yacanye urumuri. Minisitiri w’Intebe w’Ubuhinde, Narendra Modi kuri uyu wa Mbere yatangarije abaturage b’iki gihugu ko urugendo rwo kurandura icyorezo cya Coronavirus ruzaba rurerure ariko abasaba kudacika intege mu guhuza imbaraga kugeza bageze ku ntsinzi. Minisitiri Modi yagaragaje uburyo Ubuhinde buri mu bihugu byumva ubuhambare bw’iki cyorezo anashimira abaturage uburyo bakomeje kwereka isi urugero rwiza rwo guhuza umutima mu kurwanya coronavirus. Yagize ati” Umuhate w’Ubuhinde wahaye urugero isi mu kurimbura coronavirus. Ubuhinde bwagiye bufata imyanzuro ikomeye kandi bugerageza kuyishyirira mu bikorwa ku karubanda.” Kuwa 22 Werurwe 2020, Minisitiri w’Intebe yaherukaga gusaba abaturage gukoma amashyi no kuvuza ingoma mu gihe cy’iminota itanu uhereye saa 5:00 mu rukerera, bashimira inzego z’ubuzima ku bwitange bakomeje kugaragaza mu guhangana n’icyorezo cya coronavirus. Urubuga Worldometer ruragaragaza ko Ubuhindi bufite abantu banduye Coronavirus 3,860 aho 118 yabahitanye naho 328 bakaba baramaze kuyikira.
