Umutwe wa M23 n’imitwe ya FDLR na Wazalendo ikorana n’Igisirikare cya Repubulika Iharanira Demokarasi ya Congo, bamaze iminsi ibiri barwanira mu gace ka Kahumiro gaherereye muri Parike ya Virunga.
Amakuru avuga ko imirwano ikaze ikomeje gusakiranya ziriya mpande zombi yatangiye ku wa Gatatu tariki ya 20 Kanama.
Bivugwa ko M23 iyobowe na Gen. Sultani Makenga ari yo yatangije ibitero muri kariya gace, mu rwego rwo kurandura FDLR isanzwe ikabarizwamo.
Mu mirwano yabaye ku wa Kane tariki ya 21 Kanama, yumvikanyemo urusaku rw’imbunda ziremereye n’izoroheje; ibyaciye igikuba mu baturage basanzwe bakorera ubuhinzi hafi ya kariya gace.
Radio Okapi y’Umuryango w’Abibumbye ivuga ko hari n’abaturage bo muri Chefferie ya Bwito baba bamaze kugwa muri iriya mirwano, mu gihe abandi bahunze ingo zabo berekeza mu gace ka Kibirizi.
M23 na FDLR baherukaga kurwanira hafi ya Parike ya Virunga mu kwezi gushize, mu mirwano yasize uriya mutwe urwanya ubutegetsi bwa RDC ushinjwe kwica abaturage bari hagati ya 140 na 320; n’ubwo wo uhakana ibyo birego bya Loni n’umuryango Human Rights Watch.
