Ikipe ya APR FC igomba guhagararira u Rwanda mu irushanwa rya CECAFA Kagame Cup, yisanze mu itsinda rya kabiri.
Amakipe 12 ni yo agomba kwitabira ririya rushanwa rizabera i Dar Es Salaam hagati y’itariki ya 2 n’iya 12 Nzeri.
Tombola y’iri rushanwa yabereye i Nairobi kuri uyu wa Kane, yasize APR FC yakinnye umukino wa nyuma wa CECAFA mu mwaka ushize yisanze mu itsinda rya kabiri.
Ni itsinda iyi kipe y’Ingabo z’Igihugu ihuriyemo n’amakipe ya Bumamuru FC yo mu Burundi, NEC yo muri Uganda na Mlandege FC yo muri Zanzibar.
Andi matsinda arimo irya mbere ririmo ikipe ya Singida Big Stars izakina na Rayon Sports muri CAF Confederation Cup ihagarariye Tanzania, Garde Cotes FC yo muri Djibouti, Ethiopian Coffee SC yo muri Ethiopia na Kenya Police FC yo muri Kenya.
Itsinda rya nyuma ririmo Al Hilal yo muri Sudani, Kator FC yo muri Sudani y’Epfo, Mogadishu City yo muri Somalia na Alahly SC Wad Madani yo muri Sudani.
